Telegram мобил қурилмалардан ҲАМАСнинг расмий каналига кириш имкониятини чеклади. Бу ҳақда мессенжер Android фойдаланувчиларини хабардор қилди, деб ёзмоқда “ТАСС”.
“Сиз обуна бўлган айрим каналларга кириш Telegram версиянгизда Google Play қоидаларига мувофиқ чекланиши мумкин”, — дейилади хабарномада.
Эндиликда мобил қурилмадан ҲАМАС каналига кирмоқчи бўлганлар учун “Бу каналга кириш чекланган” билдиришномаси кўринади.
Apple қурилмасидан каналга киришга уринганлар ҳам шунга ўхшаш билдиришномага дуч келмоқда. “РИА Новости” чеклов Apple фойдаланувчиларига ҳам тааллуқли эканини ёзди.
“ТАСС”нинг аниқлик киритишича, ҲАМАСнинг ҳарбий қаноти “Ал-Қассам бригадалари” канали ҳам блокланган. Шу билан бирга, ҳаракат матбуот котиби Иззат ар-Ришқанинг канали, ҲАМАСнинг иттифоқчилари бўлмиш “Исломий жиҳод” ва “Ҳизбуллоҳ” каналлари ҳали ишламоқда.
Мессенжер ҲАМАС каналларига кириш ҳуқуқини сақлаб қолмоқчи бўлган Android фойдаланувчиларига мобил иловани Play market орқали эмас, тўғридан тўғри Telegram веб-сайтидан юклаб олишни таклиф қилди. Каналлар мессенжернинг веб-версиясида ҳам ишламоқда.
Аввалроқ Telegram асосчиси Павел Дуров ҲАМАС каналининг ёпилиши жанговар зонада содир бўлаётган воқеалар ҳақидаги маълумотлар билан боғлиқ вазиятни ёмонлаштириши мумкинлигини айтганди:
“Ашкелонга ракета ҳужумларидан олдин ҲАМАС Telegram орқали тинч аҳолини ҳудудни тарк этиши кераклиги ҳақида огоҳлантирган. Ушбу канални ёпиш ҳаётни сақлаб қолишга ёрдам берадими ёки уларни хавф остига қўядими?” — деб ёзганди Дуров.
Изоҳ (0)