Россия Адлия вазирлиги 1992-1993 йилларда ташқи ишлар вазирининг ўринбосари, Россия Фанлар академиясининг Жаҳон иқтисодиёти ва халқаро муносабатлар институти бош илмий ходими Георгий Кунадзени “хорижий агент” деб эълон қилди.
Адлия вазирлиги сайтида пайдо бўлган рўйхатдан сиёсатшунос Михаил Савва ва Владимирдаги “Довод” нашри бош муҳаррири Илья Косигин ўрин олган.
Россия Адлия вазирлиги маълумотларига кўра, ҳар учала шахс “Россия давлат органлари томонидан қабул қилинган қарорлар ва улар олиб бораётган сиёсат тўғрисида ёлғон маълумот тарқатган”. Хусусан, Косигин “чет эл агентларининг хабарлари ва материалларини кўп одамларга тарқатишда иштирок этган”. Журналист бошчилигидаги “Довод” нашри август ойида “чет эл агенти” сифатида тан олинган эди.
Кунадзе эса “чет эл тузилмалари тақдим этган ахборот платформаларида тизимли равишда респондент сифатида иштирок этган”, Савва бўлса “Украина ташкилотининг экспертлар кенгаши аъзоси”. Гап 2022 йилда Россиянинг “Meмориал” инсон ҳуқуқлари жамияти ва Беларуснинг “Весна” инсон ҳуқуқлари маркази асосчиси Алес Беляцкий билан биргаликда тинчлик учун Нобель мукофотини олган Фуқаролик эркинликлари маркази ҳақида бормоқда.
Сентябрь бошларида Россия Адлия вазирлиги “Новая газета” бош муҳаррири, 2021 йилги тинчлик бўйича Нобель мукофоти совриндори Дмитрий Муратовни “хорижий агентлар” реестрига киритганди.
Изоҳ (0)