АҚШ ва Исроил ҲАМАС ҳаракати ағдарилганидан кейин БМТ ҳамда бошқа араб давлатлари қўллаб-қувватловида Ғазо секторида муваққат ҳукуматни тузиш имкониятини муҳокама қилишни бошлади. Бу ҳақда Bloomberg ўз манбаларига таяниб хабар берди.
Маълумотларга кўра, муҳокама ҳозирда дастлабки босқичда ва унинг тақдири воқеалар ривожига, жумладан Исроил томонидан Ғазо секторида ўтказиладиган операция муваффақиятига боғлиқ.
Исроил томонида бир неча бор Ғазо секторини эгаллаб олиш ниятида эмаслигини таъкидлаган, шу билан бирга ҲАМАСнинг 7 октябрдаги ҳужумидан кейин унинг бошқарувига йўл қўйиб бўлмаслигини қайд этмоқда.
Bloomberg манбаларига кўра, Қўшма Штатлар Исроил қуруқликдаги операцияси оқибатларини яхши ўйлаб чиқмаганидан хавотирда.
Аввалроқ Исроил Ғазони тўлиқ блокадага олганини эълон қилиб, Ливан ва Суриянинг бир қатор ҳудудларига ҳам зарба бера бошлаганди. Тўқнашувлар Ғарбий соҳилда ҳам содир бўлмоқда. Исроил томонида 1,5 минггача одам можаро қурбони бўлди, 4,5 мингдан ортиқ киши жароҳат олди.
ҲАМАС ва Исроил уруши
7 октябрь куни ҲАМАС жангчилари Исроилга қарши кенг кўламли ҳужум уюштирди. Ўшандан бери Исроил ҲАМАС назорати остидаги аҳоли зич жойлашган Фаластин ҳудудига йирик ҳаво ҳужумларини амалга оширди. Исроил армияси гуруҳни йўқ қилиш учун Ғазо секторида қуруқликдаги кенг кўламли операцияга ҳозирлик кўрмоқда.
Изоҳ (0)