Қашқадарёда кўп қаватли уйларда яшовчи 1881 та хонадон эгаси «дом»лар олдида ноқонуний қурилиш қилгани маълум бўлди

Қашқадарё вилоятидаги мавжуд кўп қаватли уйларда яшовчи яшовчи 1881 та хонадон эгаси «дом»лар олдида ноқонуний қурилишни амалга оширган. Бу ҳақда вилоят Уй-жой коммунал хизмат кўрсатиш бошқармаси ахборот хизмати маълум қилди.

Маълум бўлишича, кўп хонадонли уй-жой фондидан фойдаланишни назорат қилиш инспекцияси 2022 йилнинг ўтган даври мобайнида 2037 та уй-жой фондини ўрганиб чиққан. Ўрганишлар давомида 1881 та хонадон эгаси кўп қаватли уйга туташ ҳудудларда ўзбошимчалик билан қурилмалар барпо этгани маълум бўлган.

«Шундан сўнг 89 та ҳолатда мулкдорларга уларни ихтиёрий равишда бузиш ҳақида мажбурий кўрсатмалар берилди. Шундан 49 таси мажбурий тартибда буздиришга оид судларга топширилди. 33 та маъмурий баённома бўйича судлар томонидан 5 миллион 751 минг сўм жарима жазоси тайинланди. Қолган 40 та мажбурий кўрсатмалар берилган фуқароларга нисбатан маъмурий баённомалар расмийлаштирилиб судга топшириш бўйича ишлар олиб борилмоқда», — дейди Кўп хонадонли уй-жой фондидан фойдаланишни назорат қилиш инспекциясининг вилоятдаги масъули Абдурасул Сафаров.

Вилоятда шунингдек, кўп квартирали уй-жой мулкдорларининг кўп квартирали уйларни капитал таъмирлашни амалга ошириш учун жамғариладиган маблағларидан мақсадли фойдаланиш масаласи ҳам ўрганиб чиқилган.

«Қарши шаҳридаги ‘Алекс’ хусусий уй-жой мулкдорлари ширкатида аҳолидан йиғилган 7 миллион 17 минг сўм пул банкка кирим қилинмасдан ўзлаштирилганлиги аниқланди. Аниқланган камчиликлар бўйича чоралар кўриш учун 2022 йил 7 февраль куни Қарши шаҳар прокуратурасига тақдимнома киритилди. ‘Пахтазор ҳақиқати’ ширкати томонидан ҳам 13 миллион 501 минг сўм маблағ банкка кирим қилинмасдан ўзлаштирилганлиги аниқланган. Бу бўйича ҳам Қарши шаҳар прокуратурасига тақдимнома киритилган», — дейилади бошқарма ахборот хизмати тарқатган маълумотда.