Сўз устаси Ҳожибой Тожибоевнинг муаллифлик ҳуқуқи унинг вориси — қизи Интизор Тожибоева томонидан ҳимояланган. Бу ҳақда Адлия вазирлиги Интеллектуал мулк департаменти ахборот хизмати хабар берди.
Қайд этилишича, Ўзбекистон Республикаси қонунчилигига мувофиқ муаллифлик ҳуқуқи муаллифнинг вафотидан сўнг асар эълон қилинганидан кейин етмиш йил давомида ҳуқуқий ҳимояга эга бўлади.
Шу боис Ўзбекистон Республикаси ва Тожикистон Республикасида хизмат кўрсатган артист, сўз устаси марҳум Ходжимурод Тоджибоевнинг (Ҳожибой Тожибоев) муаллифлик ҳуқуқларини ҳимоя қилиш мақсадида унинг вориси Интизор Тожибоева мулкий ҳуқуқларни жамоавий асосда бошқарувчи ташкилот орқали Адлия вазирлигига мурожаат қилган, — дейилади департамент ахборотида.
Қўшимча қилинишича, “Р.Р.С.” МЧЖга тегишли бўлган “Н” радиоканалида текширув ўтказилган ва текширув давомида Ҳожибой Тожибоевнинг ҳажвиялари муаллифнинг меросхўри бўлган Интизор Тожибоеванинг рухсатисиз радио эфирларида янграган.
Ушбу ҳолат бўйича “Р.Р.С.” МЧЖга қонун ҳужжатлари бузилиши, уларнинг сабаблари ва бунга олиб келувчи шарт-шароитларни бартараф этиш тўғрисида тақдимнома киритилиб, ҳуқуқбузарлик бартараф этилди. Муаллифлик ҳуқуқи обектларидан муаллиф (унинг вориси) ёки мулкий ҳуқуқларни жамоавий асосда бошқарувчи ташкилотлар билан тузилган шартнома асосида фойдаланилиши лозим, — дейди дапартамент масъуллари.
Изоҳ (0)