Янги рекорд: Жиззахда бир гектар ердан 150 тонна пиёз ҳосили олинди

Жиззах вилояти Зомин туманида бир гектар ердан 150 тонна пиёз ҳосили олинди. Бу ҳақда Қишлоқ хўжалиги вазирлиги ахборот хизмати хабар берди.

Қайд этилишича, бугунги кунда дунёда 4,5 миллион гектар майдонга пиёз экилиши натижасида 92,1 миллион тонна маҳсулот етиштирилмоқда. Ўртача ҳосилдорлик эса, гектаридан 19,3 тоннани ташкил этмоқда. Дунё миқёсида пиёз етиштириш бўйича Хитой, Ҳиндистон, АҚШ, Эрон давлатлари етакчи ўринни эгаллайди.

Ўзбекистонда ҳам пиёзнинг янги серҳосил ва турли муддатларда етиштиришга мос навларини яратиш, уруғидан, кўчатидан ҳамда нўшидан етиштиришда такомиллашган технологияларни, хусусан, сув тежовчи технологиялар — томчилатиб, ёмғирлатиб суғориш тизимини қўллаш орқали ҳозирги кунда бир қатор фермерлар пиёздан яхши ҳосил олмоқда. 

Жиззах вилояти, Зомин тумани, Чорвадор ҚФЙ ҳудудидаги “Жилғалисой шабадаси” фермер хўжалиги раҳбари Бахтиёр Мирзаев жорий йилда тик қудуқ қазиб, ўз далаларига томчилатиб суғориш технологияларини жорий этиш натижасида, фермер хўжалиги далаларида ўзи етиштирган маҳаллий пиёз уруғларини экиб, рекорд даражада пиёз етиштиришга эришди. Ҳосил ҳар гектар майдондан 150 тоннани ташкил этиб, бу борада янги рекорд ўрнатилди. 

“Бу йилги натижа билан тўхтаб қолиш ниятимиз йўқ, кейинги йилда Қишлоқ хўжалиги вазирлиги тизимидаги илмий тадқиқот институтлари олимлари билан биргаликда гектаридан 160 тонна ҳосил олишни режа қилганмиз. Худо хоҳласа, кейинги 3 йилда ҳосилни янада кўпайтириб, гектаридан 200 тоннагача ҳосил олишни ўз олдимизга мақсад қилиб қўйганмиз”, — дейди фермер Бахтиёр Мирзаев.