Икки томонлама ҳарбий ҳамкорлик масалаларини муҳокама қилиш мақсадида Озарбайжон мудофаа вазири генерал-полковник Зокир Гасанов бошчилигидаги ҳарбий делегация Ўзбекистонга ташриф буюрди, деб хабар бермоқда Мудофаа вазирлиги матбуот хизмати.
Қайд этилишича, 19 октябрь куни делегация вакиллари мудофаа вазири генерал-лейтенант Баҳодир Қурбонов ҳамроҳлигида “Бухоро” полигонига борди. Полигонда ҳарбий делегацияни расмий кутиб олиш маросими бўлиб ўтди.
Икки томонлама ҳарбий ҳамкорлик масалаларини муҳокама қилишга қаратилган расмий учрашувда Ўзбекистон мудофаа вазири ўзаро яқин дўстона муносабатлар янги стратегик шерикчилик босқичига кўтарилганлигини қайд этди. Ўзбекистон ва Озарбайжон ўртасидаги мудофаа соҳасидаги ҳамкорлик ҳар икки давлат армиясини янада мустаҳкамлашга хизмат қилаётгани алоҳида таъкидланди.
Ўзбекистон ва Озарбайжон ўртасидаги ҳарбий, ҳарбий-техникавий, ҳарбий таълим ва бошқа йўналишлардаги ҳамкорликни ривожлантириш истиқболлари, минтақавий хавфсизлик масалалари ҳамда томонларни қизиқтирган бошқа бир қатор масалалар муҳокама қилинди.
Учрашув давомида икки давлат мудофаа вазирлари ҳарбий соҳада эришилган ютуқлар ва келгусида амалга оширилиши режалаштирилаётган масалалар борасида ҳам фикр алмашди. Ҳамкорликни давом эттириш борасида таклифлар билдирилди.
Учрашув сўнгида эса томонлар ўртасида 2024 йилга мўлжалланган ҳарбий ҳамкорлик меморандуми имзоланди.
Изоҳ (0)