Андижон вилояти ҳокими Шуҳрат Абдураҳмонов Асака тумани ҳокимини ишдан олди. Бу ҳақда вилоят ҳокимлиги ахборот хизмати хабар берди.
Маълум қилинишича, Андижон вилояти ҳокими қарорига асосан Асака тумани ҳокими лавозимида фаолият юритиб келган Бегзод Умматов вазифасидан озод этилди. Вилоят ҳокими ўринбосари Насибилло Мўминов Асака тумани ҳокими вазифасини вақтинчалик бажарувчи этиб тайинланди.
Туманнинг собиқ ҳокими Бегзод Умматов меҳнат фаолияти давомида давлат бошқарув тизимида бир қатор вазифаларда ишлаган. Жумладан, 2004—2010 йилларда банк соҳасида ишлаган, 2011 йилдан Рақобатни ривожлантириш Давлат қўмитаси тизимида турли лавозимларда фаолият олиб борган. 2017—2019 йиллар давомида Вазирлар Маҳкамасида ишлаган.
Умматов 2019 йилнинг февраль ойидан 2022 йил октябрь ойига қадар Монополияга қарши курашиш қўмитаси раисининг ўринбосари сифатида ишлаб келаётганди. 2022 йил октябрь ойидан ҳозирга қадар Асака тумани ҳокими лавозимида ишлаган.
Изоҳ (0)