Хориждаги талабалар ҳақида ҳикоя қилувчи O‘zbekistonlik.Students лойиҳаси йўлга қўйилди

Қандай қилиб дунёнинг энг нуфузли университетларига ўз кучи билан ўқишга кириш мумкин? Қаерда ўқиса бўлади? Қандай имтиҳонлар топширилади? Чегаранинг нариги томонида сизни нималар кутяпти? Стипендия олиш ва яшаш учун пул топиш йўллари қандай?

Буларнинг барчаси ҳақида Ўзбекистон ёшларига уларнинг тенгдошлари — O‘zbekistonlik.Students янги ҳужжатли фильми қаҳрамонлари сўзлаб беради. Биринчи қисм премьераси 16 сентябрь 18.00 да Мy5 телеканалида ва Uzbekistan’s Club YouTube каналида бўлиб ўтади.

Премьера эпизодида томошабинлар Оксфорд Университети талабаси Муштарий Мадраҳимова ва East London Университети талабаси Азизбек Аҳмаджонов ҳикояларига гувоҳ бўлишади. Улар қандай қилиб Буюк Британиянинг энг яхши университетларига бепул ўқишга кириш, стипендия олишга эришганлари ҳақида батафсил сўзлаб беришади, шунингдек, ўз сирлари билан бўлишади.

O‘zbekistonlik.Students шоусининг бош ғояси — Ўзбекистон ёшларига хорижда ўқиш билан боғлиқ реал имкониятлар ҳақида айтиш, шунингдек, машаққат билан ўқиган ва ишлаганлар дунёнинг энг яхши ОТМларини забт эта олишини кўрсатишдан иборат. Шоу қаҳрамонлари сифатида фақатгина ўзининг меҳнаткашлиги ва тиришқоқлиги туфайли ўқишга кирган талабалар танланади.

Сериал бош ҳомийлари — Ucell уяли алоқа оператори ва Турин Политехника Институти. Лойиҳа “қанотлари” — Uzbekistan Airways миллий авиакомпанияси. Лойиҳа Ўзбекистон Республикаси Ёшлари ишлари агентлиги томонидан қўллаб-қувватланди.

Юксак мақсадларни кўзлаган сериал “Ўзбекистонлик” фильмлари серияси ва шу номдаги халқаро форумлар орқали таниш бўлган Uzbekistan’s Club ижодий жамоаси томонидан суратга олинди. Шоу бошловчилари — таниқли блогерлар Ҳуснора Шодиева ва Темур Алихонов. Режиссёр — Рустам Мелиев.

Uzbekistan’s Club — бутун дунё бўйлаб муваффақиятли ўзбекистонликларни бирлаштириш учун яратилган глобал майдон. Клуб медиа-маҳсулотлари Ўзбекистон ёшларини ўз касбларида юксак чўққиларни забт этишга илҳомлантиради, уларнинг қаҳрамонлари эса ибрат тимсоли вазифасини ўтайди. Uzbekistan’s Club миссияси — ўзбекистонликлар имижини замонавий, меҳнаткаш ва интеллектуал миллат сифатида тарғиб қилишдан иборат.