Фарғона вилоятининг Фарғона тумани “Водил” аҳоли пунктида ходимларга қаршилик қилган икки фуқарога нисбатан қурол қўллангани ҳақида хабар берилганди. Чегара қўшинлари ахборот хизмати ҳолат сабабини очиқлади.
Маълум қилинишича, “Бўстон” МФЙдан ўтувчи йўлга ўрнатилган постда ҳарбий хизматчилар ўз вазифасини бажараётган вақтда ушбу ҳудудда ҳаракатланиб келаётган машина кўрикдан ўтказиш мақсадида тўхтатилган ва машинанинг салон қисмида ноқонуний равишда олиб келинган товарлар борлиги аниқлангач, ҳолатга ойдинлик киритиш бўйича икки нафар фуқаро Чегара қўшинлари бўлинмасига боришга таклиф этилган.
Бироқ фуқаролар хизматчиларнинг талабларига фаол қаршилик кўрсатиб, воқеа жойидан яширинишга уринган. Айнан шу вақтда назорат пункти яқинида йиғилган уларнинг шериклари спиртли ичимлик таъсирида ҳарбий хизматчиларнинг қонуний талабларига бўйсунмаган ва фаол қаршилик кўрсатиб, куч ишлатиши оқибатида ҳарбий хизматчилар турли кўринишдаги тан жароҳатлари олган. Кучлар тенг келмагани боис хизматчилар фуқароларнинг ноқонуний ҳаракатларини тўхтатиш мақсадида Давлат чегараси тўғрисидаги қонуннинг 64-моддасига амал қилган ҳолда огоҳлантирувчи ўқ узган. Бунга қарамасдан, улар ғайриқонуний ҳаракатларни давом эттирган.
Огоҳлантиришдан тўғри хулоса қилмай, хизматчиларга қаршилик кўрсатишда давом этган фуқароларнинг икки нафари қурол қўлланиши натижасида вафот этган. Тегишли ҳуқуқ идоралар томонидан текширув ишлари олиб борилмоқда.
Изоҳ (0)