Бир қанча давлатлардан Ўзбекистонга парвозлар ҳажми кескин оширилди

Халқаро йўналишларда парвозлар географияси кенгайтирилди, деб хабар бермоқда Транспорт вазирлиги ахборот хизмати.

Маълум қилинишича, 2023 йилнинг январь сентябрь ойларида мамлакат аэропортларида 59 700 та ҳаво кемасига ҳамда 7 290,5 минг йўловчига хизмат кўрсатилди. Истанбул, Дубай, Франкфурт, Сеул каби халқаро аэропортлардан Ўзбекистон шаҳарларига парвозлар ҳажми кескин оширилди. Хусусан:

• Истанбулдан Тошкент, Фарғона, Самарқанд, Бухоро ва Урганч аэропортларига ҳафталик парвозлар частотаси 14 тадан 64 тага;
• Дубайдан Тошкент, Фарғона ва Самарқанд халқаро аэропортларига ҳафталик парвозлар частотаси 6 тадан 28 тага;
• Сеул ва Тошкент йўналишидаги авиақатновлар 8 тадан 14 тага;
• Тошкентдан Франкфурт халқаро аэропортига парвозлар 1 тадан 4 тага оширилди. 

Ўзбекистонга келувчи хорижий сайёҳларга қулайлик яратиш, уларга танлаш имконини тақдим этиш мақсадида Uzbekistan Airways, Тurkish Airlines, Air Baltic, Malaysian Airlines, Korean Air,  Lufthansa, Delta, China Southern Airlines авиакомпаниялари билан Interline ва Code Share шартномаларини имзолади.