Тошкент вилоятининг Чирчиқ шаҳридаги деҳқон бозори рўпарасида шаҳар Ободонлаштириш бошқармасига қарашли ҳудудда ноқонуний бозор ташкил этилган бўлиб, ундан тушаётган даромад маҳаллий бюджетга эмас, кимларнингдир чўнтагига тушаётгани айтилмоқда. Бу ҳақда “Дарё”га Халқ депутатлари шаҳар кенгаши депутати Жаҳонгир Тўлаганов гапириб берди.
Депутатга кўра, Чирчиқ деҳқон ва озиқ-овқат бозори ҳудудида қонуний савдо қилаётган тадбиркорлар бозор ташқарисидаги ноқонуний ёйма бозор фаолиятидан норози бўлиб, бозорга келаётган харидорлар ёйма бозордаги маҳсулотлар билан чекланиб, бозор ичкарисига кирмаётганидан, бу эса уларнинг даромади камайишига сабаб бўлаётганидан шикоят қилган.
Бозор ичкарисидаги тадбиркорлар депутатларга мурожаат қилиб, “Солиқ учун ҳам, инфратузилма учун ҳам пул тўлаяпмиз. Лекин харидорлар, аҳоли бозор ичкарисига кирмаяпти. Биз қандай қилиб бу пуллардан давлатга тўлов тўлаймиз”, деган ҳақли саволни беришмоқда, — дейди депутат мазкур масалада сўз юритар экан.
Жаҳонгир Тўлагановнинг маълумот беришича, мазкур муаммо етти ойдан бери кун тартибида турибди. Аммо масъуллар бунга эътибор қаратмаяпти.
Бу масалани сессия кун тартибига ҳам қўйдик. Лекин бу ноқонуний савдо тўхтамаяпти. Демак, бунинг ортида кимдир турибди. Кўриб турганингизнинг ҳаммаси ноқонуний савдо ҳисобланади. Бу ерда савдо қилувчилардан ҳеч бири давлатга солиқ тўламайди. Тўлов ундирилмаяпти. Шунинг ҳисобига шаҳарда орттирилган маблағимиз кам бўлмоқда. Чирчиқда депутатларга, ҳокимиятга бўлаётган мурожаатларнинг ҳаммаси маблағ билан боғлиқ бўлади. Биз шу мурожаатчиларга ёрдам беролмаяпмиз. Лекин бу ердан тушаётган даромад кимнингдир чўнтагига оқиб кетяпти. Агар бу кимнингдир чўнтагини тўлдирмаганда, аллақачон бу ноқонуний савдонинг олдини олишар эди. Боиси айнан шу ҳудуд шаҳар прокурорининг сектори ҳисобланади. Прокурор аллақачон бунга чора кўрган бўлар эди, — дейди депутат.
Депутат ноқонуний савдо қилаётганлар масъулларни ташвишлантирмаётганини айтар экан, “шу ҳудудда савдо қилувчилар фаолиятини қонунийлаштирса, биз уларни тадбиркорлар деб ҳурмат қиламиз, лекин ҳужжат қилмасдан ноқонуний савдо қилишда давом этса, биз депутатлар бозор ичида қонуний савдо қилаётган тадбиркорлар фаолиятини ҳимоя қилишимиз керак”, деди.
Жаҳонгир Тўлагановнинг қўшимча қилишича, депутатлар бу муаммо хусусида нафақат Халқ депутатлари шаҳар кенгашида гапирган, шаҳар прокурори ва шаҳар ИИБ бошлиғига бундай ноқонуний савдога чек қўйиш борасида таклиф ҳам берган.
Бозор ташқарисида минглаб ноқонуний савдо қилаётганларга эркинлик берилиши, бозор ичкарисида қонуний савдо қилаётганларнинг манфаатига зид бўлмоқда. Бу масала сессияда кўтарилганига етти ойдан ошди. Буни ҳоким ҳам, прокурор ва шаҳар Ички ишлар бошлиғи ҳам кўрди. Нимага бунга чора кўрилмаяпти, дедик. Нега прокурор секторида бундай ноқонуний ҳаракат бўляпти, дедик. Аммо натижа йўқ, — дейди депутат.
Депутатнинг ҳисоб-китобига кўра, ҳудудда ноқонуний савдо қилаётганлар минг нафарга етади.
Уларнинг ҳар бири ЯТТ очиб, қонуний рўйхатдан ўтган ҳолда ҳар ой 500 минг сўмдан тўлов қилса, қанча пул бўлади? Ўша пул маҳаллий бюджетга тушиб, депутатлар муҳокамаси билан тўғри сарфланади. Бу пулдан қанча бева-бечораларга ёрдам берилади, — дейди депутат Жаҳонгир Тўлаганов.
Депутат муаммога раҳбарлар ҳам эътибор қаратиши кераклигини уқтирмоқда.
Изоҳ (0)