Хитойга медиа–тур: ўзбекистонлик журналистлар EXEED заводида бўлди

EXEED компанияси томонидан ўзбекистонлик журналист ва блогерлар учун Хитойга медиа–тур ташкил этилди. Бу ҳақда “Дарё” мухбири хабар бермоқда.

Иштирокчилар дастлаб Синдао шаҳрида жойлашган, ақлли технологиялар асосида барпо этилган Super Intelligent Factory заводига ташриф буюрди.

Айни пайтда заводда EXEED автомобилларининг тўртта — LХ, VX, ТXL, RХ моделлари ишлаб чиқарилмоқда. Яқин келажакда E03 ва EОY русумли янги электромобиллар ҳамда гибрид автомобиллар ишлаб чиқариш йўлга қўйилади.

“Ҳозирда заводимизда йилига 50 мингта автомобиль ишлаб чиқарилмоқда. Келгусида бу кўрсаткични 200 мингтага етказиш режалаштирилган”, — дейди EXEED Uzbekistan директор ўринбосари Гуо Ян Лан.

Super Intelligent Factory фаолияти 2022 йилда йўлга қўйилган. Завод автомобиль дизайнидан тортиб уни ишлаб чиқаришгача бўлган жараённи қамраган. Хусусан, иншоот штамплаш, пайвандлаш, бўяш ва умумий йиғиш, R&D маркази, синов ва текшириш объектларини ўз ичига олади.

Пайвандлаш устахонасига дунёдаги энг илғор АИ сифат назорати тизими ўрнатилган бўлиб, ишлаб чиқариш линияси 350 та робот билан жиҳозланган. Автомобиль ишлаб чиқариш жараёнининг 90 фоизини АИ роботлари бажаради. Замонавий технологиялар асосида қурилган заводда ҳар 90 сонияда битта автомобиль ишлаб чиқарилади.

Бўяш устахонаси дунёдаги етакчи “нол углеродли” ақлли ишлаб чиқариш, энергия тежовчи ва атроф-муҳитни муҳофаза қилиш бўйича янги технологияга эга. Асосий жараёнлар тўлиқ автоматлаштирилган тарзда кечади.

Иншоотлар устки қисмига қуёш панеллари ўрнатилган ва улар йилига 14 миллион кВт/соат электр энергияси ишлаб чиқаради ҳамда завод сарфлайдиган электрнинг 34,7 фоизини қоплайди.

Медиа–тур иштирокчилари заводнинг штамплаш, пайвандлаш ва умумий йиғиш жараёнлари билан таништирилди.

Шу билан бирга, тайёр автомобиллар тест-драйви ҳам ўтказилди.

Ўзбекистонлик тадбиркор Улуғбек Мадумаров ҳам EXEED мижози сифатида медиа–турда иштирок этмоқда. Унинг айтишича, иккита EXEED автомобили харид қилган.

“Автомобиль сотиб олишдан аввал турли русумдаги машиналарни бир ой давомида ўргандим. Нархи, от кучи, сарф–харажатлари ва албатта тўловдан кейин қанча вақтда олиш мумкинлигини таққосладим. Кейин EXEED’ни танладим. Чунки у менга ҳар томонлама маъқул келди. Тўлов қилишим билан автомобилимни навбатсиз беришди. Сифати нархига жуда мос келади. Ҳозир Хитойдаги заводга келиб, EXEED’нинг янги RХ моделини кўрдик. Унга янги функциялар қўшилган. Масалан, ўриндиқларида массаж бор экан, кондиционери ҳам ноодатий, салони ҳам ажойиб”, — деди у.

Компания вакилларининг маълум қилишларича, EXEED автомобиллари дунёнинг 80 та мамлакат ва минтақаларига экспорт қилинади. Компания ҳамкорлари Европа, яқин шарқ, Марказий Осиё давлатлари ҳамда Шимолий Америка ҳисобланади.

EXEED бундан тўрт ой олдин Ўзбекистон бозорига ҳам кириб келган. Ҳозирги кунда республикада автомобилларнинг LХ, VX, ТXL моделлари сотилмоқда.

Компаниянинг Тошкент шаҳрида иккита, Урганч ва Фарғонада биттадан савдо марказлари мавжуд.

Жорий йил охиригача мамлакатда яна 10 та савдо маркази очилиши режалаштирилган. 2024 йилда янги русумдаги EXEED RХ ҳам Ўзбекистон бозорига кириб келади. 

Айни пайтда EXEED компанияси ташкил этган медиа–тур давом этмоқда. Ташриф дастуридан компания томонидан уюштириладиган анжуманлар ҳам ўрин олган.