Президент фармони билан “2022–2026 йилларда республиканинг фармацевтика тармоғини жадал ривожлантиришга оид қўшимча чора-тадбирлар тўғрисида”ги фармонга ўзгартириш киритилди. Бу ҳақда Telegram’даги “Ҳуқуқий ахборот” канали хабар берди.
Унга кўра, 2024 йил 1 январдан фармацевтика маҳсулотлари харидларига ажратилиши режалаштирилган давлат бюджети маблағлари миқдори доирасида маҳаллийлаштириладиган фармацевтика маҳсулотларини ижобий клиник синовлар натижалари, давлат рўйхатидан ўтказиш ҳамда сертификатлаш жараёнлари асосида 10 йилгача бўлган муддатга шартнома тузиш орқали кафолатли харид қилиш механизми жорий этилади (илгари 3 йил эди).
Сентябрь бошларида USAID Ўзбекистонда дори воситалари сифати ва хавфсизлигини ошириш бўйича ҳамкорлик қилиши тўғрисида хабар берилганди. Ўзбекистонда дори воситалари сифатини яхшилаш ва фармацевтика тармоғи ривожланишини қўллаб-қувватлаш мақсадида, USAID ва Соғлиқни сақлаш вазирлиги ҳузуридаги Фармацевтика маҳсулотлари хавфсизлиги маркази ўртасида англашув меморандумини имзоланган.
Шунингдек, аввалроқ президент қарорига асосан Соғлиқни сақлаш вазирлиги тизимида тиббиёт ва фармацевтика ходимларининг назарий билимлари, амалий кўникмалари, касбий маҳоратини аттестациядан ўтказиш ва уларга малака тоифалари бериш функцияларини амалга оширувчи Тиббиёт ва фармацевтика ходимларининг малакасини баҳолаш маркази ташкил этилган эди.
Изоҳ (0)