Фаластин бош вазири Муҳаммад Штае ҲАМАС ва Исроил ўртасидаги зиддиятнинг кучайиши сабабли Ғазо сектори инсонпарварлик фалокатига дуч келаётганини айтди, деб ёзмоқда Wafa.
Штае Ғазо секторига дори-дармон ва озиқ-овқат етказиб бериш учун хавфсизлик коридорларини сақлаб қолишни талаб қилди.
“Президент Маҳмуд Аббос ушбу ёрдам оқимини сақлаб қолиш ва юзлаб ярадорларни Миср касалхоналарига ўтказишни осонлаштириш учун халқаро томонлар билан интенсив алоқаларни ўрнатмоқда”, — деди у.
Исроил ҲАМАС ҳужумига жавобан Ғазо секторига электр энергияси, газ ва сув таъминотини, шунингдек, озиқ-овқат ва дори-дармон етказиб беришни тўхтатиш ҳақида эълон қилганди, бунинг оқибатида Ғазо оғир гуманитар инқирозга юз тутиши мумкин. Маҳаллий аҳолининг айтишича, 7-октябрдан бери ҳудудга гуманитар ёрдам кирмаган.
Ғазода 2,3 миллионга яқин аҳоли истиқомат қилади, уларнинг 80 фоизи инсонпарварлик ёрдамига қарам. Бу ҳудуд бир қатор мамлакатларда террорчи деб тан олинган ҲАМАС гуруҳи томонидан назорат қилинади.
Бироқ Ғазонинг соҳилбўйи қисми ва ҳаво ҳудуди Исроил назорати остида қолмоқда. Шунингдек, Исроил армияси Ғазога қандай юк ва одамлар киришини назорат қилади.
Изоҳ (0)