Арманистон бош вазири Никол Пашинян Қорабоғда жойлашган Россия тинчликпарвар контингенти минтақани тарк этгач, Россияга қайтиши кераклигини айтди. У тинчликпарвар кучларнинг Арманистонга жойлаштирилиши эҳтимоли ҳақидаги саволга шундай жавоб берди.
“Булар Россия Федерациясининг Тоғли Қорабоғдаги тинчликпарвар қўшинлари. Улар чиқиб кетадиган бўлса, Россияга қайтиши керак”, — деди Пашинян Арманистон жамоат телевидениесига берган интервьюсида.
Шу билан бирга, у Россия тинчликпарвар кучларининг Қорабоғда бўлиши масаласи Арманистон позициясига боғлиқ эмаслигини таъкидлади.
“Россия Озарбайжон билан муайян музокаралар олиб бормоқда. Бу масала биз билан ҳам муҳокама қилиняпти”, — деди у.
Россия тинчликпарвар контингенти Россия, Арманистон ва Озарбайжон ўртасида 2020 йил 10 ноябрдаги келишувга мувофиқ Қорабоғга жойлаштирилганди. Уч томонлама ҳужжат 2025 йилгача минтақада тинчликпарвар кучларнинг бўлишини, бу муддатни узайтириш имкониятини кўзда тутади.
Россия ТИВ вакили Мария Захарованинг қайд этишича, Арманистон Қорабоғни Озарбайжон ҳудуди деб тан олганидан сўнг минтақада тинчликпарвар кучларнинг бўлиш шартлари ўзгарган. Унинг сўзларига кўра, уларни жойлаштириш масаласи Озарбайжон ҳукумати билан муҳокама қилинмоқда. Россия ташқи ишлар вазири ўринбосари Михаил Галузин минтақада тинчликпарвар кучларнинг қолиши “талаб” эканини айтди.
5-октябр куни Россия тинчликпарвар кучлари Қорабоғдаги собиқ алоқа чизиғи бўйлаб вақтинчалик кузатув постларини демонтаж қила бошлади. Шу билан бирга, тинчликпарвар контингентни минтақадан олиб чиқиб кетиш ҳали режалаштирилмагани таъкидланди.
Изоҳ (0)