Гавайи архипелагидаги энг йирик ороллардан бири, сайёҳлар орасида машҳур бўлган Мауи оролини ўрмон ёнғинлари қамраб олди. Сўнгги маълумотларга кўра, 36 киши ҳалок бўлган. Деярли бутун архипелагни ўзи ичига оладиган АҚШнинг Гавайи штати вице-губернатори ёнғинларни мисли кўрилмаган деб атади.
Табиий ёнғинларга жазирама ҳаво ва қурғоқчилик сабаб бўлган, оловнинг тез тарқалишига ороллардан юзлаб километр жанубда Тинч океани узра кўтарилган шиддатли “Дора” тўфони шамоллари ёрдам беряпти.
Ердаги иқлим ўзгариши оқибатида юзага келган иссиқ об-ҳаво жорий йилнинг ёзида АҚШнинг кўплаб штатларида, шунингдек, Европа ва Осиёда ҳам кузатилди.
Гавайидаги ўрмон ёнғинлари Калифорния ва бошқа Америка штатларида рўй берган ёнғинларга қараганда кичикроқ бўлса-да, маҳаллий аҳоли илгари ҳеч қачон бундай кўламдаги оловни кўрмаганини айтмоқда.
“Мен драма қилмоқчи эмасман, лекин Мауида ҳеч қачон бундай ҳодиса содир бўлмаган”, — деди маҳаллий сюрфинг мактаби раҳбари AFP’га. “Ёнғинлар жуда кўп ҳудудларни қамраб олгани ноодатий ҳодиса, улар бутун оролни ўраб олган”.
Вайронагарчиликнинг катта қисми Лахайна машҳур туристик шаҳрига тўғри келди. Ёнғин оқибатида у деярли бутунлай вайрон бўлди, фақат аксарият биноларнинг вайроналари қолди.
Одамлар оловдан қочиб, ваҳима ичида океан томон югуряпти. АҚШ қирғоқ хавфсизлик хизмати ёнғинлардан қутулиш учун ўзини океанга ташлаган 12 нафар маҳаллий аҳолини олиб чиққанини маълум қилди.
Ёнғинлар туфайли минглаб одамлар электр ва телефон алоқасидан маҳрум бўлган, кўпчилик эвакуация қилинган. Расмийларга кўра, 4 000 га яқин одам туристик оролни тарк этишга ҳаракат қилмоқда.
Изоҳ (0)