4-октябр куни Тошкент иссиқлик таъминоти оператори (иссиқ сув ва иситиш) Veolia Energy Tashkent компанияси биносида иситиш мавсумига тайёргарлик кўришга бағишланган матбуот анжумани бўлиб ўтди.
Матбуот анжуманида Veolia Energy Tashkent компаниясининг тижорат директори Мақсуд Норметов журналистларнинг баъзи саволларига жавоб берди.
– Бу йилги қиш мавсумида ўтган йилгига ўхшаб камчиликлар кузатилмайдими?
– Қиш мавсуми якунига етганидан кейин барча коммунал соҳада қишга тайёргарлик жараёни бошланади. Мана ҳозир шаҳарнинг кўплаб жойларида қувурларни алмаштиряпмиз. Тасарруфимиздаги барча қозонхоналарни таъмирлаб, қишга тайёр қилдик.
Қарс икки қўлдан чиқади. Биз меъёр бўйича 85 градусдаги иссиқликни етказиб берамиз. Мана шу иссиқликни уйнинг компанияси биздан олиб, истеъмолчига етказиб бериши керак. Бунинг учун истеъмолчи компанияга пул тўлайди. Агар газимиз яхши бўлиб турса, қозонхоналар 85 градусдаги иссиқликни чиқариб бера олади. Ҳозир кўпчилик ўтган қиш мавсумида юзага келган ҳолатни гапирмоқда. Ўтган йили газ етишмовчилиги туфайли иссиқлик етказиб бера олмадик. Агар газ яхши бўлса, уйларни иссиқлик билан бемалол таъминлай оламиз.
– Қиш мавсумида уйларда хона ҳарорати неча градус бўлиши керак?
– Уй ичида ҳарорат 18 градус бўлиши керак. Бизда ўзбошимчалик ҳолатлари кўп. Шунинг ҳисобига иситиш тизими ўзгариб кетган. Ҳозир кўпчилик уйидаги иссиқлик батареяларини олиб ташлаган. Лекин уйнинг режаси қилинаётганда ҳамма нарса ҳисобга олинган бўлади. Яъни бир хона қизимаса, бу ён атрофдаги қўшни хонадонларга ҳам таъсир қилади. Кўплаб кўп қаватли уйларнинг биринчи қавати дўкон қилиб юборилган. Биринчи қават совуқ бўлгани ҳисобига тепадаги уйлар исимайди.
— Агар бу йил ҳам Ўзбекистонда газ дефицити юзага келса, қозонхоналар ишламай қоладими?
– Ҳозир Тошкент шаҳрида мазутда ишловчи 4 та қозонхона мавжуд. Агар газ дефицити пайдо бўлса, бу қозонхоналар мазут ёқиб, аҳолига иссиқлик етказиб бериши мумкин.
2023 йил май ойида Veolia Energy Tashkent компанияси Бектемир (“Водник” қозонхонаси) ва Сергели (“Саноатэнерго” қозонхонаси) туманларида замонавий қозонхоналар қуришни бошлаган. Қурилиш ёпиқ иссиқлик таъминоти тизимига ўтиш бўйича пилот лойиҳаси доирасида амалга оширилмоқда.
Маълумот учун, ёпиқ иситиш тизими билан сув тўғридан тўғри иссиқлик истеъмоли жойида, аниқроғи объектнинг ўзида иситилади. Бу очиқ тизимда (иссиқлик энергиясини қозонхонадан бинога ташишда) муқаррар равишда юзага келадиган иссиқлик энергиясини йўқотишининг олдини олади.
Ҳозирда 2 та қозонхонага барча технологик ускуналар ўрнатилиб, қурилиш ишлари якунланмоқда.
Маълумотларга кўра, “Водник” қозонхонасига ҳар бири 10 ва 5 МВт қувватга эга 2 тадан қозонлар ўрнатилган. “Саноатэнерго” қозонхонасида эса ҳар бири 6 МВт қувватга эга 3 та қозон қурилган.
Изоҳ (0)