Профессионал бокснинг супер ўрта вазн (-76,2 кг) тоифаси вакили Бектемир Мелиқўзиев (13-1, 10 КО) Ўзбекистон вақти билан 8-октябрь тонгида ўзининг навбатдаги жангини ўтказди.
АҚШнинг Лас-Вегас шаҳрида бўлиб ўтган бокс оқшомида ўзбекистонлик боксчига Алантес Фокс (28-5-1, 13КО) рақиб бўлди. 10 раундга белгиланган беллашувнинг 4-раундида Бектемир томонидан берилган кетма-кет зарбалардан сўнг ҳакам жангни тўхтатди ва техник нокаут қайд этди.
Шу тариқа Мелиқўзиев ўзининг WBA Intercontinental чемпионлик камарини яна бир марта ҳимоя қилди.
Эслатиб ўтамиз, Бектемир сўнгги жангини 23 апрель куни Габриэль Росадога ўтказиб, ғалаба қозонганди. Ушбу жанг реванш бўлиб, боксчилар 2021 йил 19 июнида ҳам рингга кўтарилган ва унда Росадо нокаут эвазига зафар қучганди.
Изоҳ (0)