Professional boksning super o‘rta vazn (-76,2 kg) toifasi vakili Bektemir Meliqo‘ziyev (12-1, 9 KO) O‘zbekiston vaqti bilan 23-aprel tongida o‘zining navbatdagi jangini o‘tkazdi.
AQSHning Las-Vegas shahrida bo‘lib o‘tgan boks oqshomida o‘zbekistonlik bokschiga Gabriel Rosado (26-17-1, 15 KO) raqib bo‘ldi. Jang to‘liq 10 raund davom etdi. Dastlabki ikki raund o‘rtacha tempda o‘tdi va kichik ustunlik Meliqo‘ziyev tomonidan bo‘ldi. Uchinchi raundga kelib Bektemir faollikni oshirdi va raqibiga sezilarli zarbalarni o‘tkaza oldi.
Beshinchi raundda Meliqo‘ziyev chap qo‘l zarbasidan keyin raqibini muvozanatdan chiqarishga erishdi. Keyingi uch raund ham O‘zbekiston vakilining yaqqol ustunligida o‘tdi. To‘qqizinchi raundda Bektemir zarbalar seriyasi orqali Rosadoga kuchli bosim o‘tkazdi. O‘ninchi raundda ham Meliqo‘ziyev raqibiga imkon qoldirmadi. Yakunda hakamlar bir ovozdan o‘zbekistonlik bokschining g‘alabasini qayd etdi — 99-91, 99-91, 99-91.
Shu tariqa Bektemir Rosadoga qarshi kechgan ikkinchi jangni g‘alaba bilan yakunlandi. Meliqo‘ziyev 2021-yil 19-iyunida ham Rosadoga qarshi ringga chiqib, bellashuvning 3-raundida ayanchli nokautni qabul qilib olgandi.
O‘sha jangdan keyin Rosado 3 bor ringga chiqib, barchasida (Mungia, Sheyn Mosli Junior va Ali Ahmedovga) ochkolar evaziga mag‘lub bo‘ldi. Meliqo‘ziyev esa 4 ta jangda g‘alaba qozongandi: Sergey Yekimov, Devid Zegarra, Sladan Janjanin va Ulises Siyerra mag‘lub etilgan.
Izoh (0)