Самарқанд давлат университети ректори Рустам Холмуродовга Хитойнинг Сиан Жиатонг университети фахрий профессори унвони берилди. Бу ҳақда Самарқанд давлат университети ахборот хизмати маълум қилди.
Айтилишича, Хитойда ўтказилаётган Ипак йўли университетлари ассоциациясининг йиғилишида Сиан Жиатонг университетининг президенти, профессор Ванг Шугуо Самарқанд давлат университети ректори, Ўзбекистон фан арбоби, Олий Мажлис Сенати аъзоси Рустам Холмуродовга Сиан Жиатонг университетининг фахрий профессори унвонини топширган.
Хитойнинг Сиан Жиатонг университети 2015 йил январь ойида Ипак йўли университетлари ассоциацияси иттифоқини тузиш ташаббусини илгари сурган.
“2015 йил 22 май куни Сиан шаҳрида Ипак йўли университетлари ассоциацияси ташкил этилган. Сиан декларацияси қабул қилинган. Ассоциацияга ҳозирга қадар 37 мамлакатдан 150 дан ортиқ университетлар аъзо ҳисобланади”, — дейилади университет ахборотида.
Маълумот учун, Самарқанд давлат университети мазкур тузилмага 2018 йилда аъзо бўлган.
Изоҳ (0)