Samarqand davlat universiteti rektori Rustam Xolmurodovga Xitoyning Sian Jiatong universiteti faxriy professori unvoni berildi. Bu haqda Samarqand davlat universiteti axborot xizmati maʼlum qildi.
Aytilishicha, Xitoyda o‘tkazilayotgan Ipak yo‘li universitetlari assotsiatsiyasining yig‘ilishida Sian Jiatong universitetining prezidenti, professor Vang Shuguo Samarqand davlat universiteti rektori, O‘zbekiston fan arbobi, Oliy Majlis Senati aʼzosi Rustam Xolmurodovga Sian Jiatong universitetining faxriy professori unvonini topshirgan.
Xitoyning Sian Jiatong universiteti 2015-yil yanvar oyida Ipak yo‘li universitetlari assotsiatsiyasi ittifoqini tuzish tashabbusini ilgari surgan.
“2015-yil 22-may kuni Sian shahrida Ipak yo‘li universitetlari assotsiatsiyasi tashkil etilgan. Sian deklaratsiyasi qabul qilingan. Assotsiatsiyaga hozirga qadar 37 mamlakatdan 150 dan ortiq universitetlar aʼzo hisoblanadi”, — deyiladi universitet axborotida.
Maʼlumot uchun, Samarqand davlat universiteti mazkur tuzilmaga 2018-yilda aʼzo bo‘lgan.
Izoh (0)