Ўзбекистон президенти ёрдамчиси Саида Мирзиёева Тошкент шаҳридаги Ботаника боғининг Тошкент шаҳар ҳокимлиги балансига ўтказилиши ҳақида тарқалган хабарларга муносабат билдирди.
“Ботаника боғи — бу кўнгилочар жой эмас. Бу — бутун шаҳримиз ҳар куни нафас олаётган Тошкентнинг ўпкаси. Бу — биз ғурурланадиган тарих”, — дейди президент ёрдамчиси.
У 70 йилдан ортиқ вақт давомида истеъдодли олимлар ушбу боғда бебаҳо дарахтлар ва ўсимликларни етиштирганини, уларга ўз меҳр-муҳаббатини бағишлаганини қайд этди.
“Юртимизда бундай маскан бошқа ҳеч қаерда йўқ. Табиатнинг ана шу бир парчасини асраб-авайлаш, уни ҳимоя қилиш ва болаларимизга етказиш бизнинг бурчимиздир. Мен Ботаника боғини тижорий тузилмалар бошқарувига топширишга қатъиян қаршиман. Унинг бир сантиметри ҳам ижарачи ёки қурувчиларга берилмаслиги шарт”, — дея таъкидлади Саида Мирзиёева.
Билдирилишича, боғни олимлар яратган ва у олимлар ихтиёрида бўлиши, бутун ўзбекистонликлар учун хизмат қилиши лозим.
“У Фанлар академияси ихтиёрида қолади”, — деб ёзди президент ёрдамчиси.
Аввалроқ Project.gov.uz порталида Вазирлар Маҳкамасининг “Истироҳат боғлари фаолияти ва уларни бошқариш тизимини тубдан такомиллаштириш тўғрисида”ги қарори лойиҳаси эълон қилинганди. Унга кўра, маданият ва истироҳат боғларини вилоятлар ҳокимликлари ҳузурида ташкил этиладиган “Истироҳат боғларини бошқариш дирексиялари” тасарруфига ўтказиш кўзда тутилган. Ушбу маълумот жамоатчиликнинг кескин норозилигига сабаб бўлди.
Кейинроқ пойтахт ҳокимлиги Ботаника боғи Тошкент шаҳар ҳокимлиги балансига ўтказилмаслигини маълум қилди.
“Ҳокимлик ушбу илмий даргоҳнинг мамлакат экотизимини асраш, ўсимликлар генофондини сақлаш ва кўпайтиришдаги аҳамиятини эътироф этади ва уни истироҳат боғига айлантиришга йўл қўймайди”, — дейилади расмий баёнотда.
Изоҳ (1)
Саида Мирзияева аралашганидан кейин даров Ботаника богини хокимият балансига утказиш рад этилди. Саида Опа Сизга рахмат