Швеция мудофаа вазири Пал Жонсон Украинага 2,2 миллиард швед крони (199 миллион доллар) миқдоридаги янги ёрдам пакети берилишини маълум қилди.
Янги пакет асосан артиллерия ўқ-дориларидан иборат. Жонсон матбуот анжуманида Украинага қирувчи самолётлар юбориш имкониятини ҳам кўриб чиқаётганини таъкидлади, деб хабар беради Reuters.
Ҳукумат мамлакат қуролли кучларидан Jac Gripen қирувчи самолётларини 6 ноябргача етказиб бериш имконияти ҳақида сўради. Вазирнинг таъкидлашича, Швеция ички хавфсизлиги нуқтаи назаридан самолётларни жўнатишдан олдин мамлакат НАТОга аъзо бўлиши керак.
Ажратилган ёрдам Швециянинг Украинага 14-ёрдам пакети бўлди. 2022 йилнинг февралидан бошлаб шведлар Украинага умумий қийматда 22 миллиард швед кронидан ортиқ ёрдам тақдим қилган.
2022 йил май ойида Швеция ва Финляндия НАТОга аъзо бўлиш учун ариза беришди. 2023 йил 4 апрелда Финляндия иттифоққа қўшилди. Туркия Швециянинг терроризмга қарши кураш бўйича мажбуриятларини бажаришини талаб қилиб, унинг альянсга қўшилишига тўсқинлик қилди.
Август ойида НАТО бош котиби Швецияни бу йил кузда альянсга қўшишни таклиф қилган эди. Туркия Швециянинг аризасини маъқуллашга рози бўлди, бироқ ёзда Туркия парламенти таътилга чиқиб кетди.
Изоҳ (0)