1960 йиллардан бери қўшиқлари мусиқий чартларда биринчи ўринни эгаллаб турган машҳур хонанда Шернинг Майами шаҳридаги ҳашаматли уйи сотувга қўйилди.
Хонанда Шернинг мухлислари уни “поп мусиқаси маъбудаси” деб аташади. У 100 миллиондан ортиқ пластинка чиқарган ва қўшиқчилар эришиши мумкин бўлган барча мукофотларни олган — “Гремми” ва “Эмми”дан тортиб “Оскар” ва учта “Олтин глобус”гача. 1960 йилларда қўшиқчи эри билан “Сонни ва Шер” дуэтини ташкил қилади, ажрашгандан кейин ҳам муваффақиятли яккахон карьерасини давом эттиради. У Бродвейда чиқиш қилади, фильм ва телевидениеда рол ўйнайди, фолклордан тортиб дискотека ва роккача турли жанрларда ижод қилади. Шер ҳозирда 1960 йиллардан 2010 йилларгача кетма-кет олти 16 давомида Billboard чартида биринчи ўринни эгаллаган ягона хонандадир.
Мусиқадан ташқари, Шер интерер билан шуғулланишни яхши кўради — у Гавайи ва Калифорниядан тортиб Нью-Йорк ва Флоридагача бўлган бир нечта ҳашаматли уйларга эгалик қилади. 1993 йилда Шер Майамидаги Ла Горс оролида уй сотиб олиб, уни ўзи безатади ва уч йилдан сўнг уйни Калвин Клеин асосчиларидан бири Барри К. Шварцга сотади. Икки қаватли, 1250 квадрат метрлик оқ тошдан қурилган турар жой ҳозирда 42,5 миллион долларга сотувга қўйилган.
Бу уй Шернинг Мавритания меъморчилиги элементларига бўлган муҳаббатининг ажойиб намунаси. Катта деразалар ва очиқ айвонлар туфайли хоналарда ҳар доим табиий ёруғлик етарли даражада бўлади.
Ошхона америкача услубда бўлиб, улкан стол, мармар пештахталар ва барча керакли техникалар билан жиҳозланган. Ҳашаматли уйда меҳмонхона, икки кишилик мармар ванна ва душ билан жиҳозланган ҳаммом, кийиниш хонаси ва катта айвон мавжуд. Қулайлик яратиш мақсадида уйда фитнес марказ ва кинозал мавжуд.
Турар жой соҳилнинг рўпарасида жойлашган бўлиб, ташқаридан Мексика кўрфази манзараси кўриниб туради. Уй атрофи палмалар билан ўралган, ҳовлида эса катта бассейн, гидромассажли ванна, сауна ва ёзги уйча мавжуд.
Изоҳ (0)