Ўзбекистонда 2023 йилнинг ўтган даврида дарахтларнинг ноқонуний кесилиши билан боғлиқ 2 427 та ҳуқуқбузарлик қайд этилиб, шундан 714 туп қимматбаҳо навли дарахтлар ноқонуний кесилишига йўл қўйилган. Бу ҳақда Бош прокуратура матбуот хизмати хабар берди.
Қайд этилишича, Қизил китобга киритилган ўсимликлар режасиз ва назоратсиз йиғиб олиниши натижасида табиий захиралар ва популяцияларининг ўсиш майдонлари қисқариши кузатилмоқда.
Масалан, Сурхондарё вилояти “Боботоғ” давлат ўрмон хўжалиги ҳудудида июль-сентябр ойларида 11 550 туп табиий ҳолда ўсувчи тожик кавраги доривор ўсимлиги ноқонуний кесилиб, табиатга 5,7 миллиард сўм зарар етказилгани ҳолати юзасидан жиноят иши қўзғатилиб, тергов ҳаракатлари ўтказилмоқда.
Республика бўйича жами 67,7 минг гектар майдонни ташкил этувчи ўрмон фонди ер участкаларини ижарага бериш билан боғлиқ 8065 та ҳужжатлар хатловдан ўтказилиши натижасига кўра, ўрмон фонди ер участкаларини қонунчилик ҳужжатлари талабларига зид равишда ижарага бериш ҳолатлари аниқланиб, 18 та жиноят, 46 та маъмурий ва 23 та интизомий ишлар қўзғатилган ҳамда ноқонуний эгалланган 1539 гектар ерлар ўрмон фонди ҳисобига қайтарилган.
Умуман назорат тадбирлари давомида аниқланган қонун бузилиши ҳолатларини бартараф этиш тўғрисида мутасадди идораларга 107 та тақдимнома киритилган, 206 та ноқонуний ҳужжатларга протест келтирилди, судларга тўртта даъво аризаси киритилди, 304 нафар шахслар маъмурий ва интизомий жавобгарликка тортилган, қўпол қонун бузилиши ҳолатлари бўйича 7 та жиноят иши қўзғатилган ҳамда 228 нафар фуқароларнинг бузилган ҳуқуқлари тикланган.
Ноқонуний дарахт кесиш ҳолатлари
Аввалроқ Хоразмда ўзини тадбиркор деб таништирган шахслар истироҳат боғидаги дарахтларни кесиб ташлаганди. Бухорода 22 туп қарағай ноқонуний кесилиб, табиатга 144,3 миллион сўмлик зиён етказилганди. Фарғонадаги чегара пости яқинида 12 туп манзарали дарахт қўпориб ташлангани хабар қилинганди.
Изоҳ (0)