Европа Иттифоқи Украина билан унинг иттифоққа кириши бўйича музокаралар бошлангани ҳақида декабрь ойида расман эълон қилмоқчи, деб хабар берди Politico уч европалик дипломатга таяниб.
Ноябрь ойида Еврокомиссия Украина ЕИга кириш учун зарур шартларни қай даражада бажараётгани ҳақида оралиқ ҳисобот эълон қилади. Унинг ортида Комиссия баёноти берилади, шундан сўнг Европа Иттифоқига аъзо давлатлар учун “қани, музокараларни бошлаймиз демаслик жуда қийин бўлади”, деди нашр манбаларидан бири.
“Сиёсий босим анча кучли бўлиши аниқ, чунки муайян давлатлар қаршилик кўрсатади. Ишчи тахмин чиндан ҳам шундай: декабрь ойига қадар Европа Кенгаши музокараларни бошлашга қарор қилади”, — деди исми сир қолишини истаган манба.
Европа Иттифоқига аъзолик бўйича музокараларни бошлаш учун Киев Европа комиссияси қўйган етти шартни бажариши керак. Украина ҳукумати улардан фақат иккитасини — суд-ҳуқуқ ислоҳоти ва оммавий ахборот воситалари тўғрисидаги қонун билан боғлиқ шартларни бажарганини маълум қилган.
Politico манбаларининг қайд этишича, Европа Иттифоқи етакчилари ҳуқуқий асос бўйича келишилмаган ҳолда музокаралар ўтказишга рухсат берувчи сиёсий баёнот чиқаради. Суҳбатдошлардан бири Киевнинг Европа Иттифоқига кириш йўлида муваффақият кўрсатаётганини, ҳалигача муаммоли кўринаётган ягона масала Украинадаги озчиликларнинг аҳволи билан боғлиқлигини таъкидлади.
Украина Россиянинг кенг кўламли босқини бошланганидан сўнг дарҳол Европа Иттифоқига аъзо бўлиш учун ариза берди. Бир ой ичида расмийлар икки мингдан ортиқ саволларни ўз ичига олган ЕИ махсус анкетасини тўлдирди. 2022 йил 23 июнь куни Европа Иттифоқи етакчиларининг саммитида Украина ва Молдова учун Европа Иттифоқига номзодлик мақоми келишиб олинди. Турли ҳисоб-китобларга кўра, Украинага тўлиқ Европа интеграцияси учун 10 йилдан 20 йилгача вақт керак бўлиши мумкин.
Изоҳ (0)