АҚШ Конгресси Вакиллар палатаси аъзолари республикачи Кевин Маккартини спикерлик лавозимидан четлаштириш тўғрисидаги резолюцияни қўллаб-қувватлади, деб ёзмоқда CNN.
Қарор учун 216 нафар палата аъзоси овоз берди, 210 нафари қарши чиқди. Хусусан, овоз бериш ташаббускори Метт Геце бошчилигидаги саккиз нафар республикачи Маккартининг истеъфосини ёқлаб чиқди.
30-сентябр куни Маккарти демократлар билан келишувга эришиб, 45 кунлик федерал харажатларни молиялаштириш учун бюджет резолюциясини қабул қилганди, бу ҳукумат фаолияти тўхтатилишининг олдини олишга ёрдам берди. Ушбу муроса туфайли Геце ўз партиядошининг истеъфосини талаб қилди.
CNN таъкидлаганидек, Қўшма Штатлар тарихда ҳеч қачон Вакиллар палатаси спикерни резолюция асосида ишдан олмаган.
Республикачилар партиясининг Шимолий Каролина штати вакили Патрик Макгенри АҚШ Конгресси қуйи палатасининг муваққат спикери этиб тайинланди.
Шунга ўхшаш ҳолат АҚШ Вакиллар палатасида фақат бир марта — 1910 йилнинг мартида кузатилган, деб ёзади The New York Times. Ўшанда овоз бериш пайтида республикачилар “Жо амаки” сифатида танилган спикер Жозеф Каннонни лавозимидан четлатишга ҳаракат қилган. У ўз лавозимини сақлаб қолишга муваффақ бўлган, аммо палатадаги мавқейи заифлашган.
Изоҳ (0)