Футбол бўйича ЖЧ—2030 6 та мамлакатда бўлиб ўтади

Футбол бўйича 2030 йилги Жаҳон Чемпионати 6 та мамлакатда бўлиб ўтади.

ФИФА кенгашининг йиғилиши бўлиб ўтди ва унда 2030 йилги мусобақани ўз уйида қабул қилиш учун ариза юборган барча мамлакатлар танлаб олишга қарор қилинди. Унга кўра, ЖЧ—2030 Аргентина, Испания, Португалия, Уругвай, Парагвай ва Марокашда ўтказилади. 

Учта ўйин Жанубий Америкада ўтказилади. Очилиш ўйини Уругвайда бўлиб ўтади. Унда маҳаллий терма жамоа ўз ўйинини ўтказади. Шунингдек, Аргентина ва Парагвай ҳам гуруҳлардаги ўйинларини ўз мамлакатида ўтказади. 

Турнирнинг қолган ўйинларини эса Испания, Португалия ва Марокаш ўзида қабул қилади. 

KONMEBOL президенти Алехандро Домингез ўз Twitter саҳифасида: “Биз ишонгандик. ЖЧ—2030 мундиал ибтидоси бўлган жойда бошланади. Уругвай, Аргентина ва Парагвай Жаҳон Чемпионатининг юбилей очилиш ўйинларини ўзида ўтказади”. 

2030 йилда Жаҳон Чемпионатининг 100 йиллиги нишонланади. Биринчи мундиал 1930 йилда Уругвайда бўлиб ўтган.