Москванинг Басманний суди “Биринчи канал” собиқ ходими Марина Овсянниковани сиртдан саккиз ярим йилга умумий режимли колонияга ҳукм қилди, деб хабар бермоқда “Медиазона”.
Суд Овсянниковани Россия армияси ҳақида сиёсий нафрат қўзғатувчи “фейк” тарқатишда айбдор деб топди. Прокуратура Овсянникова учун тўққиз ярим йиллик қамоқ жазосини сўраган.
Марина Овсянникова 2022 йил март ойида “Биринчи канал”даги жонли эфир вақтида урушга қарши плакат билан чиққанди. Шундан кейин у дунёга танилди. Акциядан сўнг журналист ишдан бўшатилди, Россияни тарк этди ва бир неча ой Германияда ишлади. Кейинчалик у Москвага қайтиб келди ва урушга қарши ҳаракатларда қатнашишни давом эттирди. У армияни “обрўсизлантириш” моддаси бўйича уч марта жаримага тортилди.
2022 йил август ойида Овсянниковага қарши Россия армияси ҳақидаги “фейк” учун жиноий иш очилди. Бунга унинг Кремль рўпарасида “Путин — қотил” ёзувли плакат билан пикет уюштиргани сабаб бўлди. Плакатда “Путин — қотил. Унинг аскарлари фашистлардир. 352 нафар бола ҳалок бўлди. (Урушни) Тўхташингиз учун яна қанча болалар ўлиши керак?” — деб ёзилганди.
Овсянникова уй қамоғига олинди, аммо у ердан қизи билан қочиб кетди. Овсянникованинг ижтимоий тармоқларига кўра, у ҳозир Парижда.
Изоҳ (0)