Соғлиқни сақлаш вазири Амрилло Иноятов бошчилигидаги Ўзбекистон делегацияси Женевада Жаҳон соғлиқни сақлаш ассамблеясининг 76-сессиясида иштирок этиш учун хизмат сафарида бўлиб турибди. Бу ҳақда ССВ матбуот хизмати хабар берди.
Қайд этилишича, Ўзбекистонда туберкулёз хизматининг ислоҳ қилиниши натижасида қарийб 130 минг нафар инсон ҳаёти сақлаб қолинган, касалликка чалиниш кўрсаткичи 43 фоизга, ўлим ҳолатлари эса 84 фоизга камайган.
Ҳозир силни аниқлаш бўйича мамлакатда 5 босқичли замонавий лаборатория тизими ишлаб турибди. Хасталик профилактикаси, диагностикаси ва муолажаси учун зарур барча дори воситалари давлат томонидан бепул таъминланмоқда.
Биргина 2023 йилги давлат дастурига мувофиқ, 2023-2026 йилларда дори ва сарфлов воситалари, тиббий техника, мутахассислар тайёрлаш ва инновацион илмий изланишларга давлат бюджетидан 33 миллион, халқаро донорлар ҳисобидан эса 26,5 миллион доллар миқдорида маблағ ажратилиши кўзда тутилган.
Ўзбекистоннинг 13 та маъмурий ҳудудида “Ўпка саломатлиги” кўчма мобил бригадалари ташкил этилиб, чекка ва олис манзилларда яшовчи аҳоли бепул тиббий кўрикдан ўтказилади. Фтизиатрия ва пулмонология хизматлари интеграция қилиниши натижасида ўпка саломатлиги учун универсал ҳамда юқори технологик тиббий ёрдам бериш тизими яратилмоқда.
“Вазир ўз чиқишида тадбирда билдирилган барча мулоҳазалар келгусида БМТ Бош aссамблеяси томонидан қабул қилинадиган Сиёсий декларацияга киритиладиган якуний таклифларни ишлаб чиқишда инобатга олинишини таъкидлади”, — дейилади хабарда.
2022 йил март ойида АҚШ Халқаро тараққиёт агентлиги (USAID) томонидан сўнгги олти ой давомида Ўзбекистонга умумий қиймати қарийб 700 минг долларга тенг туберкулёзни тезкор диагностика қилишга мўлжалланган GeneXpert тизимлари беғараз тақдим этилгани маълум бўлганди.
Изоҳ (0)