Сурхондарё вилояти пахта “планини” биринчи бўлиб бажарди 

Сурхондарё вилояти пахтакорлари Ўзбекистонда биринчи бўлиб, 2023 йилги пахта топшириш шартномавий режасини ортиғи билан бажарди. 

Қайд этилишича, вилоятдаги қабул пунктларига 268 минг тоннадан зиёд хом ашё топширилган. 2023 йилда вилоятда 12 та пахтачилик–тўқимачилик кластери ва 2 096 фермер хўжалиги 72 минг 270 гектар майдонда маҳаллий иқлимга мос, эртапишар “Бухоро-102”, “Бухоро-108”, “Бухоро-110”, “Наманган-77”, “Султон” каби эртапишар ва “Термиз-202”, “СП-1607”, “СТ-1651” сингари ингичка толали ғўза навларини парваришлаган.

Пахта йиғим–теримини уюшқоқлик билан амалга ошириш учун 1 529 та отряд тузилиб, 167 минг нафардан зиёд теримчи, 1 180 та трактор ва 1 983 та тиркама жалб этилган. Шартномавий режа 30 кунда ортиғи билан уддаланган.

Тадбирда илғор секторлар, кластер ва фермер хўжаликлари раҳбарлари, шунингдек, йиғим-терим мавсумида фаол иштирок этган мутасаддиларга вилоят ҳокимининг фахрий ёрлиқ ва эсдалик совғалари топширилган.

Аввалроқ Сурхондарё вилоятида пахта режасини биринчилардан бўлиб бажарган фермерга автомобиль совға қилингани тўғрисида хабар берилганди.