Марказий Осиё мамлакатларида иқлим ва атроф-муҳитнинг болаларга хавфли таъсири юқори. Бу ҳақда ЮНИСЕФ ташкилоти эксперти Мария Осбек Самарқандда бўлиб ўтаётган эко-оромгоҳ доирасидаги маърузасида айтиб ўтди.
Қуйидаги суратдаги индекс иқлим ўзгариши болалар ва ёшларга қаерда ва қандай таъсир қилиши ҳақидаги ҳолатни кўрсатиб беради. Индексга кўра, Марказий Осиё мамлакатларида яшовчи болалар иқлим инқирози оқибатларининг “ўрта-юқори хавфи” кўрсаткичи остида туради.
Индекс иқлим ўзгаришининг болалар учун хавфи нуқтаи назаридан биринчи кенг қамровли таҳлилини ифодалайди. Ушбу ҳужжат мамлакатларни иқлим ва экологик шоклар, масалан, циклонлар ва иссиқлик тўлқинлари, шунингдек, болаларнинг базавий ижтимоий хизматлардан фойдаланиш имкониятлари асосида ушбу зарбаларга нисбатан заифлиги даражасига қараб тартиблайди.
Марказий Осиё минтақаси болалари асосан ҳаддан ташқари иссиқлик даврлари ва сув танқислиги каби муаммоларнинг хавфи остида туради.
Экология, атроф-муҳитни муҳофаза қилиш ва иқлим ўзгариши вазирлиги, Мактабгача ва мактаб таълими вазирлиги, Ёшлар сиёсати ва спорт вазирлиги, “Замин” халқаро жамоат фонди, ЮНИСЕФ, ЮНЕСКО, БМТТД ва FAO кўмагида Марказий Осиё эко-оромгоҳи ташкил этилмоқда.
Марказий Осиё эко-оромгоҳининг асосий мақсади — иқлим ўзгаришига қарши курашда ёшларнинг ролини эътироф этиш, ёш эко-фаолларга таклиф ва эко-ташаббусларни илгари суриш учун платформа яратиш, шунингдек, Марказий Осиёда ёшлар экологик ҳаракатини интеграция қилишдан иборат.
Изоҳ (0)