Россия Энгелс авиабазасида Ту-95МС стратегик бомбардимончи самолётларининг силуэтларини чизмоқда. Бу ҳақда сунъий йўлдош тасвирларига таяниб, Тhе War Zone хабар берди.
Энгелс авиабазаси Украина Қуролли кучлари томонидан ўтган йил давомида такрорий ҳужумга учради. Шундан сўнг Россия самолётларини Украина дронларидан ҳимоя қилиш учун уларни автомобиль шиналари билан қоплаганди.
29-сентябрдаги сунъий йўлдош тасвирлари эса авиабазада реал кўринишдаги самолётлар чизилганини кўрсатмоқда. Сохта Ту-95 самолётлари янада реал кўринишга эга бўлиши учун руслар ҳатто шиналарни ҳам бўяган. Авиатехникаларни бундай кўринишга келтиришдан мақсадлардан бири сунъий йўлдошларни алдашга уриниш бўлиши мумкин.
“Аммо бу аниқ ишламайди, чунки тижорат сунъий йўлдошларидан олинган чекланган юқори аниқликдаги тасвирлар ҳам самолёт силуэтларини ҳақиқийдан аниқ ажрата олади. Синтетик диафрагма радар технологияси каби бир қатор бошқа разведка манбаларидан фойдаланиб, нишон уч ўлчамли объект эмаслигини аниқлаш мумкин”, — дейилади хабарда.
Иккинчидан, самолётлар дрон операторларини чалкаштириб юбориш ва ҳақиқий самолётга зарба беришнинг олдини олиш умидида чизилган бўлиши илгари сурилмоқда.
Изоҳ (0)