Жанубий Кореяда 40 ёшли ўзбекистонлик эркак ўз ҳаётини хавф остига қўйиб, 69 ёшли кореялик аёлни ёнғиндан қутқаргани ҳақида хабар берилган эди. Мазкур эркак воқеа ҳақида айтиб берди.
Унинг сўзларига кўра, дастлаб портлаш юзага келган, кейин ёнғин бўлган. Ташқарига чиққанида олов ичида одам борлигини эшитган ва уни қутқариш учун ёнғин ҳудудига кирган. Ҳозирда аёл шифохонада даволанмоқда.
“Кечки соат 18:40 атрофида портлаш юзага келди. Кучли зарба билан пастимиздаги ресторандан олов чиқиб, қора тутунлар чиқди. Бақир-чақир бўлди, ичида одам ётгани айтилди. Олов ҳаддан ташқари кучли эди. Ўша пайт кириб, одамни олиб чиқиш фикри келиб қолди. Ресторан бошлиқлари эр ва хотин эканини билардик. Ҳойнаҳой, эгаси ўша кекса аёл, дедим. Олиб чиқиш фикри келди. Олди-орқамга қарамадим. Ҳаракатимиз, Худога шукур, яхшиликка бўлди. Кекса аёл ҳаёти сақлаб қолинди, даволанмоқда”, — дейди эркак.
Ёнғин ҳақида
Жанубий Кёнсан провинциясининг ёнғин хавфсизлиги бошқармасига Янсан шаҳридаги кекса эр-хотин бошқарадиган ресторанда ёнғин чиққани хабар берилган. Тамаддихонада портлаш овози, ойнанинг синиши ва алангага гувоҳ бўлган номаълум шахс 119 рақамига қўнғироқ қилган.
Бироқ бу орада аёл ресторанда ёлғиз бўлган, аланга тўсатдан тарқалиб кетган. Ўт ўчирувчиларнинг сўзларига кўра, аёл куйган, ҳушсиз ва оғир аҳволда бўлган.
Аёлнинг 70 ёшлардаги турмуш ўртоғи ёнғин бошланишидан олдин ресторанни тарк этган ва шиддатли ёнғин туфайли унга кира олмаган. Ҳодиса пайти қўшни виллада яшовчи Ўзбекистон фуқароси ёнаётган ресторанга кириб, аёлни олиб чиққан.
Ёнғин бутун ресторан ва яқин атрофдаги автомобилларни қамраб олган. Маҳаллий вақт билан соат 18:44 да бошланган ёнғин ўт ўчирувчилар томонидан 19:11 да тўлиқ ўчирилган. Келтирилган зарар 80 миллион вон (60 419 доллар) миқдорида баҳоланмоқда.
Айни пайтда аёл бутун танасининг иккинчи даражали куйиш жароҳати билан касалхонада даволанмоқда, унинг эри ҳам ёнғинда олган жароҳатлари туфайли муолажа олмоқда. Уни қутқарган ўзбекистонлик эркак шиша синишидан енгил тан жароҳати олган, унга воқеа жойида биринчи тиббий ёрдам кўрсатилган. Ёнғин хавфсизлиги ходимлари ҳодисанинг аниқ сабабларини ўрганмоқда.
Изоҳ (0)