“Германиядан кечаси 1 да ҳокимга ва менга телефон қилдилар” — Абдулла Арипов сафардаги президент Сергели аҳолисидан хабардорлиги ҳақида

Бош вазир Абдулла Арипов куни кеча юз берган фавқулодда ҳодиса юзасидан Сергели тумани аҳолиси билан учрашиб, улар билан мулоқот қилди.

Мулоқот вақтида фуқаролардан бири давлат раҳбари Германиядан туриб ҳам уларни унутмаганини айтди.  “Президент ҳатто Германиядан туриб ҳам бизни унутмадилар, қойилман”, — деди у.

Бунга жавобан бош вазир президент сафарда бўлса ҳам, тумандаги ҳолатдан хабардор бўлиб турганини билдирди.

“Германияда хизмат сафарида бўлиб, кечаси 1 да ҳокимга телефон қилдилар, менга телефон қилдилар. Эрталаб 8 да яна телефон қилдилар. Президентимизга барча кучлар жалб қилинганини, 24 соат давомида ишлар ташкил қилиниб, кечаси билан ишлашганини билдирдим. Сафарда бўлсалар ҳам, уларнинг эътиборларидан четда қолмайсизлар, хавотир олманглар”, — деди Абдулла Арипов.

Куни кеча Сергели туманида “Қурувчилар” даҳасида Inter Logistics МЧЖга қарашли омборхонада кучли портлаш ва ёнғин юз берганди. Содир бўлган фавқулодда ҳодисани ўрганиш, кўрилган талафотларни бартараф этиш ва жабрланганларга ёрдам кўрсатиш бўйича Шавкат Мирзиёев топшириғига асосан ҳукумат комиссияси тузилди.

Давлат раҳбарининг ўзи Германия канцлери Олаф Шольц таклифига биноан 28-сентябр куни ташриф билан Берлин шаҳрига жўнаб кетди. 29-сентябр куни президент Марказий Осиё ва Германия давлат раҳбарлари саммитида иштирок этади, Германия президенти Франк-Валтер Штайнмаер ва канцлер Олаф Шольц билан музокаралар ўтказади.