АҚШ расмийлари Россия президенти Владимир Путинни ноябрь ойида Сан-Францискода ўтказилиши режалаштирилган Осиё-Тинч океани иқтисодий ҳамкорлиги (APEC) саммитига таклиф қилмайди. Буни Россия Ташқи ишлар вазирлигининг махсус топшириқлар бўйича элчиси, APEC’даги юқори лавозимли амалдор Марат Бердиев “РИА Новости”га тасдиқлади.
“АҚШ икки томонлама каналлар орқали бизга бу йил бир қатор етакчиларни таклиф қилмоқчи эмаслигини маълум қилди, чунки уларга нисбатан санкциялар қўлланган”, — деди Бердиев.
Путин Украинада уруш бошлаганидан бери АҚШ санкциялари остида — чекловлар унга Америкага киришни тақиқлайди ва мамлакатдаги активларини блоклайди.
Washington Post газетаси АҚШ Путинни саммитга таклиф қилмасликка қарор қилгани ҳақида август ойида манбаларга таянган ҳолда хабар берганди. Вашингтон, шунингдек, 2020 йилдан бери Америка санкциялари остида қолаётган Гонконг маъмурияти раҳбари Жон Лининг тадбирда иштирок этишини тақиқлашга қарор қилди.
Россия президенти матбуот котиби Дмитрий Песковнинг “ТАСС”га айтишича, Кремль Вашингтондан саммитда иштирок этиш таклифини кутаётгани йўқ.
APEC саммити АҚШ раислигида 11—17 ноябрь кунлари Сан-Франсискода бўлиб ўтади. Осиё-Тинч океани иқтисодий ҳамкорлиги формати 1989 йилда Австралия ва Янги Зеландия ташаббуси билан яратилган.