Қашқадарё ва Фарғона вилоятларида ўқишга киритиб қўйиш билан боғлиқ фирибгарлик ҳолатлари фош этилди, деб хабар беради Бош прокуратура ҳузуридаги департамент.
Қайд этилишича, департаментнинг Қашқадарё вилоят бошқармаси томонидан тезкор тадбир ўтказилган. Тадбирда Г.Х. ва М.Р. исмли шахслар фуқаро Г.Ғ.ни Қарши шаҳридаги Абу Али ибн Сино номидаги жамоат саломатлиги техникумига ўқишга киритиб қўйишлари эвазига 1,3 минг долларни олган вақтларида ашёвий далиллар билан ушланган.
Шу каби, департаментнинг Қува туман бўлими томонидан ДХХ ходимлари билан ҳамкорликда ўтказилган тезкор тадбирда З.Ў. исмли шахс фуқаро М.А.нинг ишончига кириб, унинг қўшни Қирғизистон университетидаги ўқишини Тошкент ахборот технологиялари университетининг Фарғона филиалига кўчириб бериши эвазига 700 долларни олган вақтда ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Ноқонуний ўқишга киритиш ҳолатлари
Аввалроқ, Фарғона, Андижон, Гулистон давлат университетлари ва “Нархоз”га ўқишга киритиб қўйиш эвазига пул олган шахслар ушлангани хабар қилинганди. Шунингдек, Андижонда ўқишга киритишни ваъда қилиб, 4 минг АҚШ доллари олган ОТМ ходими қўлга олинган эди.
Изоҳ (0)