Польша президенти Анжей Дуда бош вазир Матеуш Моравецкининг Украинага қурол етказиб беришни тўхтатиш ҳақидаги баёнотини изоҳлар экан, Польша Украинани эски ҳарбий техника билан таъминлашга тайёрлигини билдирди. Бу ҳақда у Супер Express нашрига хабар берди.
Дуда бош вазир билан маслаҳатлашганидан сўнг, иккаласи ҳам Польшадан Украинага ҳар қандай янги техникаларни бериш “мумкин эмас” деган фикрга келган.
“Иккаламиз ҳам К2 гаубицалари ёки К9 танклари каби ҳозирда сотиб олаётган ҳар қандай янги техникаларни жўнатиш ҳақида гап бўлмаслигини айтдик. Бу техника Польша армиясини кучайтиришга хизмат қилиши керак. Уларни бирданига бериб юбориш учун миллиардлар сарфламаймиз”, — деди Дуда.
Шу билан бирга, сиёсатчи бу Польша Украинага қурол-яроғни умуман бермаслигини англатмаслигини таъкидлади.
“Эски техникалар замонавийларига алмаштирилса, уни муаммосиз украинларга жўнатаман. Жуда узоққа чўзилган хулосалар чиқармаслигимиз керак. Ўз ҳис-туйғуларимизни жиловлашимиз зарур, чунки Польша ва Украина ажралса, ким кўпроқ ютишини эслайлик. Оқибатлари фожиали бўлиши мумкин”, — деди Польша президенти.
Польша ва Украина ўртасидаги кескинлик
Аввалроқ Польша бош вазири Матеуш Моравецкий Польша энди Украинага қурол бермаслиги, чунки у ўз давлатини қуроллантираётгани ҳақида гапирганди. Кейинчалик ҳукумат “Краб” гаубицаларини етказиб бериш бўйича шартнома ҳали ҳам амалда эканига аниқлик киритган. Германия бу борада Польша билан музокаралар олиб боришни режалаштираётганини айтган.
Изоҳ (0)