Польша расмийлари Киевга янги қурол-яроғ етказиб беришдан бош тортгач, АҚШ ҳукумати Варшавадан Украинани ҳарбий қўллаб-қувватлаш борасидаги позициясини тушунтиришни сўради. Бу ҳақда Bloomberg агентлиги Пентагондаги юқори мартабали манбага таяниб хабар берди.
Агентлик суҳбатдошига кўра, Польша ҳануз Украинани қўллаб-қувватлашга тайёр, бироқ расмий Варшаванинг позицияси ноаниқ. Бироқ манбанинг таъкидлашича, Польша ва Украина ўртасидаги келишмовчиликлар ортидан “Киевни қўллаб-қувватловчи коалиция бирлиги ҳали дарз кетмаган”.
Европалик дипломатлардан бирининг Bloomberg агентлигига айтишича, Польша дипломатлари хорижлик ҳамкасбларини кичикроқ бўлса-да, Украинага ҳарбий ёрдам давом этишига шахсий ишонч билдирган.
Манбанинг фикрича, Польшанинг ёрдамдан бош тортиши Украинадаги ҳарбий амалиётларга салбий таъсир кўрсатиши мумкин, чунки бу НАТО бирлигига путур етказади.
Польша бош вазирининг зиддиятли баёноти
20 сентябрь куни Польша бош вазири Матеуш Моравецки Польша Украинага ортиқ қурол етказиб бермаётгани, чунки мамлакат ўз армиясини қуроллантираётганини айтди. Эртаси куни Польша президенти Анжей Дуда ОАВ Моравецкининг сўзларини “энг ёмон тарзда” талқин қилганини таъкидлаб чиқди. Дуданинг аниқлик киритишича, гап Польша ўз армиясини модернизация қилиш учун харид қилаётган янги қуроллар ҳақида кетмоқда.
21 сентябрь куни Пентагон матбуот котиби Патрик Райдер Моравецкининг сўзларини изоҳлар экан, ҳар қандай давлат Украинага қандай даражада ёрдам кўрсатишни ўзи ҳал қилади, деди.
Украина донини экспорт қилиш бўйича икки давлат ўртасида юзага келган келишмовчиликлар фонида Польша ҳукумати Украинани ҳарбий қўллаб-қувватлаш ҳақида баёнот берганди.
Изоҳ (0)