Депутатлар ҳайдовчи радарлар қаердалигини билмай туриб жавобгарликка тортилиши нотўғри эканини айтди

Қонунчилик палатаси депутатлари камераларни тартибга солиш бўйича бош вазир ўринбосарига сўров юборди.

Қонунчилик палатаси спикерининг сўзларига кўра, ҳайдовчи радарлар қаердалигини билмай туриб жавобгарликка тортилиши нотўғри. Ҳайдовчи камералар қаерда борлигидан огоҳлантирилиши керак. Шундагина унинг ҳуқуқи таъминланган бўлади. 

“Қоида бўйича ҳайдовчи йўналишга чиққанда қўлидаги телефон орқали қаерда радар борлигини билиши керак. Шундан кейин биз ҳайдовчи ҳуқуқини, эркинлигини таъминлаган бўламиз. Бир жойга беркитиб қўйилган ёки машиналар ичига қўйилган камералар тўғри келмайди. Майли қўйсин, лекин ҳайдовчига шуни айтиш керак. Акс ҳолда у жавобгарликка тортилиши нотўғри.

Бизда қонунимиз йўқ. Шуни кейинчалик қонун даражасида мустаҳкамлаб қўйсак, яхши бўлар эди”, — деган спикер.