Ижтимоий тармоқларда Тошкент вилояти ҳокимлиги мулозимлари бизнеси ҳақида материаллар эълон қилинди. Хабарлар юзасидан вилоят ҳокимлиги расмий муносабат билдирди.
Хабарда айтилишича, Тошкент вилоят ҳокимлигида ишлайдиган бир қатор юқори лавозимли амалдорлар МЧЖларда таъсисчи сифатида иштирок этган.
Вазирлар Маҳкамасининг 1992 йил 6 мартдаги «Тадбиркорлик фаолияти билан шуғулланиш тақиқланган мансабдор шахсларнинг рўйхати тўғрисида»ги 103-сон қарорига асосан тадбиркорлик фаолияти билан шуғулланиши тақиқланган мансабдор шахслар рўйхати белгилаб берилган.
Бундан ташқари, Ўзбекистоннинг «Тадбиркорлик фаолияти эркинлигининг кафолатлари тўғрисида»ги қонуннинг 3-моддасида тадбиркорлик фаолияти тушунчасига тариф берилган. Унга кўра, тадбиркорлик фаолияти (тадбиркорлик) – тадбиркорлик фаолияти субъектлари томонидан қонун ҳужжатларига мувофиқ амалга ошириладиган, таваккал қилиб ва ўз мулкий жавобгарлиги остида даромад (фойда) олишга қаратилган ташаббускор фаолият тушунилади.
Бу билан қонунда бевосита фаолият билан шуғулланиш назарда тутилмоқда. Бу қонун ҳужжатининг қўлланилиши бўйича Ўзбекистон адлия вазири Русланбек Давлетов 2021 йил 9 июлда маҳаллий нашрларнинг бирига берган интервьюсида ҳам «Амалдаги қонунчиликка кўра, давлат хизматчилари якка тартибда тадбиркорлик қила олмайди холос, лекин, масалан, МЧЖ таъсисчиси бўлишга ҳақли», – деган.
«Бугунги кунда амалда бўлган қонун ҳужжатлари бўйича хабарларда рўйхати келтирилган МЧЖлар билан Тошкент вилоят ҳокимлиги ўртасида шартномавий муносабатларга киришилмагани ёки манфаатлар тўқнашуви ҳолатлари юзасидан ҳаракатлар амалга оширилмаганини маълум қиламиз», – дейилади ҳокимлик хабарида.
Бундан ташқари, ҳокимликнинг маълум қилишича, МЧЖлар ташкил этилган вақти билан амалдорларнинг лавозимга тайинланган вақтлари солиштирилганида улар лавозимга келгунга қадар МЧЖларга таъсисчи бўлиб киргани ойдинлашади. Хусусан:
- Relах Тоur МЧЖ 2018 йил 5 июнда рўйхатдан ўтган бўлса, Тошкент вилояти ҳокимлигининг туризм ва спортни ривожлантириш масалалари бўйича котибият мудири – Раҳматуллаев Фаррух Анварович 2018 йил 18 сентябрда тайинланган ва ушбу МЧЖ очилганидан бугунги кунга қадар фаолият юритмаётган корхоналар рўйхатида туради;
- «Садаф Диёр Савдо» МЧЖ 2016 йилда ташкил этилган бўлиб, Тошкент вилояти Молия бошқармаси бошлиғи Холиқулов Олимжон Аҳмедович 2020 йилда ушбу лавозимга тайинланган бўлса-да, бугунги кунга қадар Тошкент вилоят ҳокимлиги билан ушбу МЧЖ ўртасида шартномавий муносабатлар амалга оширилмаган. Шунингдек, О. Холиқуловнинг МЧЖ раҳбарлиги борасида эса ўз фаолиятини қонун ҳужжатларига мувофиқлаштириш тўғрисида қатъий кўрсатма берилганлиги маълум қилинади;
- Smart kadastr МЧЖ 2020 йил очилган бўлса, Кадастр агентлиги Тошкент вилояти бошқармаси бошлиғи Аҳроров Жасур Давлетбоевич 2021 йилда ушбу лавозимга тайинланган бўлиб, ушбу МЧЖга ҳисоб рақами ҳам очилмаган;
- «Осиё оқшоми» 2015 йилда ташкил қилинган бўлиб, Тошкент вилояти ҳокимининг шаҳарлар инфратузилмасини ривожлантириш, ободонлаштириш ва коммунал хўжалик масалалари бўйича ўринбосари – Мелиев Барҳаёт Бахтиёржонович 2021 йилда ушбу лавозимга тайинланган, МЧЖнинг бугунги кунга қадар банкда ҳам ҳисоб рақами очилмаганлиги маълум қилинади.
- Asaxiy Films 2019 йил ташкил этилган бўлиб, Тошкент вилояти ҳокимининг матбуот котиби, ахборот сиёсати масалалари бўйича ҳокимнинг маслаҳатчиси Жумаев Ҳамза Ҳаётович ушбу МЧЖ таъсисчиси ҳисобланади ва амалдаги қонунчиликда бунга рухсат бор. Ҳамза Жумаев 2021 йил март ойида лавозимга тайинланган бўлса-да, бугунги кунга қадар Тошкент вилоят ҳокимлиги билан ушбу МЧЖ ўртасида шартномавий муносабатлар амалга оширилмаган;
- «Дархон Агро Класт» 2018 йилда ташкил этилган бўлиб, Тошкент вилояти ҳокимлигининг қишлоқ ва сув хўжалиги масалалари бўйича котибияти мудири Кадиров Фурқат Қаҳрамонович – 2020 йил февраль ойида тайинланган бўлса, бугунги кунга қадар Тошкент вилоят ҳокимлиги билан ушбу МЧЖ ўртасида шартномавий муносабатлар амалга оширилмагани, бироқ ушбу котибият мудирига МЧЖ раҳбарлиги борасида ўз фаолиятини амалдаги қонун ҳужжатларига мувофиқлаштириш тўғрисида қатъий кўрсатма берилган.
Мавзуга доир:
Изоҳ (0)