Ўзбекистон Мактабгача ва мактаб таълими вазирлиги томонидан “Директорлар учун мактабларни ривожлантириш дастури” ташкил этилган бўлиб, ғолиблар Англиянинг Портсмут университетида малака ошириш имкониятини қўлга киритади.
Уч босқичли танловда ғолиб бўлган 28 нафар директорни Англиянинг Портсмут шаҳрига 2 ҳафта давомида малака оширишга юбориш режалаштирилган.
Тошкент шаҳридаги 5-мактабда мазкур дастурнинг сўнгги босқичи сифатида семинар-тренинг бўлиб ўтди. Тренинг Буюк Британиянинг Портсмут университети Таълим, тиллар ва лингвистика бўлими бошлиғи, профессор Стивен Корбетт томонидан ўтказилди.
“Тошкентда Ўзбекистондаги мактаб директорлари: оддий, ихтисослаштирилган ва президент мактаблари директорлари билан ишлаяпман.
Мактабгача ва мактаб таълими вазирлиги билан ҳамкорликдаги янги ривожланиш дастуримиз директорларга сифатни оширишга ёрдам берадиган янги ғояларни ишлаб чиқишга мўлжалланган. Уларнинг мактабларида таълим сифатини оширишга, ўз ходимларига, ўқувчиларига ва улар хизмат қиладиган жамоаларга фойда келтиради”, — деди профессор Стивен Корбетт.
Қўшимча қилинишича, ўзбекистонлик мактаб директорлари тренинг доирасида 2 кун Англиядаги мактабларда директор сифатида амалиёт ўтайди.
Изоҳ (0)