Президент Шавкат Мирзиёев мактабларда таълим сифатини ошириш, ўқувчи ўрнини кўпайтириш ҳамда ўқитувчилар малакасини ошириш ва уларга муносиб шароит яратиш бўйича видеоселектор йиғилиши ўтказганди. Унда давлат раҳбари ҳудуддаги мактаб директорлари “Оқдарё тажрибаси”ни ўрганиши кераклигини айтганди. Деҳқонобод тумани ҳокими Зоир Алиқулов мазкур топшириқ ижросини таъминлаш мақсадида туманда фаолият юритувчи 30 нафар мактаб директорини Самарқанд вилоятининг Оқдарё туманидаги 32-мактабга хизмат сафари билан юборди.
Оқдарё тажрибасини ўрганиш чоғида мазкур мактаб чинакам ҳаёт мактаби эканлигига гувоҳ бўлдик. Ва биз ҳам ушбу тажрибани албатта туманда жорий этамиз, — дейди туман Мактабгача ва мактаб таълими бўлими бошлиғи Холиёр Менглиев.
Таъкидланишича, мазкур мактаб ўқувчилари президент ташаббуси билан йўлга қўйилган хорижий тилларга ўқитиш, шунингдек, кулолчилик, ёғоч буюмлар ўймакорлиги, бичиш-тикиш, пазандалик каби 15 хилдан ортиқ касб-ҳунар сирларини эгаллаш баробарида ўзлари яратган маҳсулотлардан даромад ҳам кўрмоқда.
Деҳқонобод тумани Мактабгача ва мактаб таълими бўлими масъулларининг таъкидлашича, “Оқдарё тажрибаси”ни Қашқадарёнинг Деҳқонобод туманида йўлга қўйиш учун туман миқёсида 2 та мактаб танлаб олинган.
Туманимиз шароитига мос касб-ҳунарлар, хусусан, автомобилларга техник хизмат кўрсатиш, пазандалик, қандолат маҳсулотларини ишлаб чиқариш, сартарошлик, сантехника хизматлари каби йўналишлар биз учун айни муддао ва биз буни йўлга қўймоқчимиз. Бу билан ўқувчилар таълим олиши билан бирга ҳам касб ўрганишига, ҳам иқтисодий манфаатдор бўлишига, бўш вақтини унумли ўтказилишига эришилади, — дейди тумандаги 23-мактаб директори Бегмат Тўрақулов.
Изоҳ (0)