Эрон жиноий суди ҳижоб ўраш қоидасини бузган аёлни “ақлли” видеокузатув камераси орқали кузатганидан кейин қамоқ жазосига ҳукм қилди. Бу ҳақда Al-Arabiya хабар берди.
Эрондаги инсон ҳуқуқлари фаоллари ташкилоти тегишли баёнотни берди. Жумладан, Теҳрон Жиноят судининг 1088-бўлими исми ошкор этилмаган аёлга ҳижоб қонунларини бузганликда айблаб ҳукм чиқарган. Аёлга эҳтимолий “Эронга қарши ахлоқи” учун икки йиллик саёҳат тақиқи ва икки ойлик қамоқ жазоси берилиши кутилмоқда.
Судья аёлнинг ҳижоб бўйича мажбурий қонунларга риоя қилмаслиги “даволаниши керак бўлган касаллиги” борлигини билдиришини айтган. Айбланувчига қўшимча равишда руҳий текширувдан ўтиш буюрилган.
“Ҳижоб ўрашдан бош тортганлик учун жиноий жавобгарликка тортилиш аёллар ва қизларнинг сўз эркинлиги ҳуқуқининг бузилиши ҳисобланади. Бу ҳаракат жиддий ташвиш уйғотади ва уни қоралаш керак”, — дейди Эрондаги инсон ҳуқуқлари фаоллари ташкилоти.
Эрон 16 сентябрь куни исломий шариат асосида аёллар учун кийиниш қоидаларини бузганликда гумон қилиниб ҳибсга олинган 22 ёшли эронлик курд Маҳса Аминийнинг ўлими туфайли юзага келган намойишлардан ларзага келди.
Намойишлар бошланганидан бери минглаб одамлар ҳибсга олинган ва бир неча намойишчилар қатл этилган.
Апрель ойида Эрон ҳукумати ҳижоб ўрамаган аёлларни аниқлаш ва жазолаш учун жамоат жойларига камералар ўрнатаётгани маълум бўлган.
Изоҳ (0)