Тан олинмаган Тоғли Қорабоғ республикасидаги инсон ҳуқуқлари бўйича комиссари Гегам Степанян 19 сентябрь куни бошланган Озарбайжоннинг “аксилтеррор” операцияси оқибатида 25 киши ҳалок бўлганини маълум қилди.
Унинг сўзларига кўра, ушбу маълумотлар Хонканди (Степанакерт) ўликхонасидан олинган. Омбудсманнинг аниқлик киритишича, ҳалок бўлганлардан икки нафари — тинч аҳоли вакиллари.
Ярадорлар сони, Степаняннинг сўзларига кўра, 200 дан ошган. Қайд этилишича, бу рақамлар Аскеран ва Мартунийдаги тиббиёт муассасалари маълумотларини ўз ичига олмайди, чунки улар билан ҳали алоқа ўрнатишнинг имкони бўлмаяпти.
Тоғли Қорабоғдаги Аскеран, Мартакерт, Мартуни ва Шуша туманларида 16 та аҳоли пунктидан 7 мингдан ортиқ аҳоли эвакуация қилинди, дея қўшимча қилди Степанян.
19 сентябрь куни Озарбайжон Тоғли Қорабоғда “конституциявий тузумни тиклаш” мақсадида “маҳаллий аксилтеррор чоралари” бошланганини эълон қилди. Кун давомида Тоғли Қорабоғ кенг кўламда ўққа тутилди. Кечқурун Боку Қорабоғда “60 дан ортиқ жанговар позициялар” назоратга олингани ҳақида хабар берди.
Тан олинмаган республика ҳукумати “мавжуд вазиятни ҳал қилиш учун” ўт очишни тўхтатиш ва музокараларни бошлаш таклифи билан Бокуга мурожаат қилди. Бунга жавобан Озарбайжон расмийлар “мамлакатнинг Қорабоғ минтақасида яшовчи арман аҳолиси вакиллари билан” учрашишга тайёрлигини билдирди. Шу билан бирга, Боку тан олинмаган Тоғли Қорабоғ ҳукумати тарқатиб юборилмагунча жанговар ҳаракатларни тўхтатиш ниятида эмаслигини таъкидлади. Озарбайжон Арманистон Қуролли кучларининг минтақадан олиб чиқилишини ҳам талаб қилмоқда.
Арманистон бош вазири Никол Пашинян Ереван жанговар ҳаракатларга киришмаслигини айтди. Унинг қўшимча қилишича, Тоғли Қорабоғда Арманистон армияси йўқ.
Изоҳ (0)