Кристофер Ноланнинг “Оппенгеймер” фильмида физик Роберт Оппенгеймер ролини ўйнаган Киллиан Mёрфи суратга олиш жараёнларидан олдин ва суратга олиш чоғида оздирувчи парҳез тутган. Бу ҳақда актёрнинг ўзи ва олим Киттининг рафиқаси ролини ижро этган актриса Эмили Блант маълум қилди.
“Киллианнинг вазифаси жуда катта эди. Унга фақат кун бўйи бодомга ўхшаш нарсаларни ейиш мумкин эди, шундан кейин ҳамкасбим жуда озиб кетди”, — дейди Блант.
Mёрфи The New York Times газетасига берган интервьюсида ўзини жуда озғин ва жуда оз овқат истеъмол қилган “атом бомбасининг отаси”га иложи борича кўпроқ ўхшашга ҳаракат қилгани учун ўзига овқат ейиш билан боғлиқ чеклов қўйгани ҳақида сўзлаб берди. Миш-мишларга кўра, олим кўп мартини ичган ва сигарета чеккан.
Mёрфининг суратга олиш жараёнларига жисмоний ва руҳий жиҳатдан тайёрланиши учун беш ойдан кўпроқ вақт керак бўлди. Актёр фильмдаги роли учун қанча вазн йўқотганини ошкор этмаган ва инсонларни мунтазам парҳезлар билан ўзларини қийноққа солмасликка чақирган.
“Бундай ҳолатда сиз ўзингиз билан курашасиз. Тавсия қилмайман”, — дейди актёр.
Бироқ, Mёрфи фильмдаги ролига шунчалик берилиб кетганки, у тўйиб овқатланмаётганини ҳам сезмаган.
“Мен энергияга тўла эдим ва овқат ёки бошқа нарса ҳақида қайғурмасдим. Ўзимни гипер кучга эга инсондек ҳис қилдим, бироқ бу нормал ҳолат, чунки персонажим шунақа эди. У ҳеч қачон овқатланмаган”, — дейди актёр.
Изоҳ (0)