“Нотўғри талқин қилинмоқда” — бош вазир матбуот котиби Россиянинг Ўзбекистонда мактаб қуриш таклифи ҳақида

Москва шаҳрида Ўзбекистон ва Россия ҳукумат раҳбарлари даражасидаги Қўшма комиссиянинг 4-мажлиси бўлиб ўтди. Учрашувда Россия бош вазири Михаил Мишустин Россия томони Ўзбекистонда рус тилида ва Россия дастурлари асосида таълим бериладиган бир нечта мактаб қуришга тайёрлигини билдирган. Бош вазир Абдулла Ариповнинг матбуот котиби Қўшма комиссия мажлисида маданий-гуманитар йўналишдаги ҳамкорлик бўйича билдирилган муайян таклиф моҳиятини нотўғри талқин қилмасликка чақирди.

Бекзод Ҳидоятов сўзларига кўра, давлатлар ўртасидаги ўзаро расмий келишувларга асосан, бир давлат ҳисобидан бошқа давлат ҳудудида мактаб ва шунга ўхшаш ижтимоий обектлар қуриш анъанаси жаҳон тажрибасида мавжуд. Бу ўзаро ижтимоий ёрдам сифатида таснифланади.

“Шуни алоҳида қайд этиш лозимки, хорижий мамлакатлар томонидан қуриб бериладиган  мактабларнинг таълим дастурлари дастлаб соҳа мутахасиссислари томонидан миллий урф-одат, қадрият ва анъаналаримиз, тарихимиз, амалдаги қонун ҳужжатларимиз, мавжуд таълим стандартларимиз нуқтаи назаридан чуқур ўрганиб чиқилади.

Агар қуриб берилиши таклиф этилгаётган мактаб ва унинг дастури юқорида назарда тутилган талабларга мазмунан мос келса, ушбу таълим муассасасининг фаолият юритиши учун ўрнатилган тартибда лицензия берилади”, — дейилади муносабатда.

Матбуот котиб мазкур жиҳатларни инобатга олган ҳолда, ижтимоий тармоқ фойдаланувчиларидан асосланмаган маълумотларни тарқатмасликларини сўраган.

Ўзбекистон бош вазири Абдулла Арипов Қўшма комиссия мажлисида таклиф мамнуният билан қабул қилинишини айтган эди.

“Таълим рус тилида олиб бориладиган мактаблар қуриш таклифини катта мамнуният билан қабул қиламиз. Шуни айтишни истардимки, Ўзбекистонда 10 мингдан ортиқ умумтаълим мактаблари бор, уларнинг 10 фоизида рус тилида таълим берилади”, — деган Арипов.

Ўзбекистон ва Россия ҳукуматлари раҳбарлари даражасидаги қўшма комиссиянинг 3-мажлиси 2022 йил декабрь ойида бўлиб ўтганди. Ўшанда икки мамлакат ҳукуматлари раҳбарлари икки давлат ўртасидаги ўзаро ҳамкорликни янада ривожлантиришга қаратилган ўндан ортиқ ҳужжатни имзолаган.

Шавкат Мирзиёевнинг Владимир Путин билан 2023 йил 9 август куни ўтказилган телефон орқали мулоқотида Ўзбекистон билан Россия ўртасидаги стратегик шериклик ва иттифоқчилик муносабатларини янада ривожлантириш масалалари муҳокама қилинган эди.