“Ўзгидромет” ҳафта давомида ҳарорат яна пасайиб, ёмғир ёғишини маълум қилди

Ўзбекистонга 19 сентябрь, сешанба куни Волга бўйи ҳудудларидан нам ва салқин об-ҳаво массалари кириб келади, деб хабар бермоқда “Ўзгидромет”.

Қайд этилишича, республика бўйича ҳаво булутли бўлади, баъзи жойларда қисқа муддатли ёмғир ёғиши мумкин, фақат жанубда ва Фарғона водийсида қуруқ об-ҳаво сақланиб туради. Республика бўйича баъзи жойларда шамол тезлиги 15-20 метр/секундгача кучайиши, айрим жойларда чанг-тўзон билан кузатилиши кутилмоқда. Ҳаво ҳарорати бир оз пасайиб, кундуз куни 26-28 даражани ташкил этади.

20 сентябрь, чоршанба куни марказий ва шарқий вилоятлар бўйича баъзи жойларда қисқа муддатли ёмғир ёғади, тоғолди ва тоғли ҳудудларда баъзи жойларда ёмғир кучли бўлади, айрим жойларда момақалдироқ кузатилади. Республиканинг қолган ҳудудларида ёғингарчилик кутилмайди.

Ҳафтанинг иккинчи ярмида Ўзбекистон ҳудуди бўйича яна қуруқ ҳаво кузатилади, фақат тоғолди ва тоғли ҳудудларда баъзи жойларда ёмғир ёғади.

20—22 сентябрь кунлари ҳаво ҳароратининг пасайиши давом этади ва кундуз кунлари 23-25 даражадан юқори бўлмайди. Кечалари ва эрталабки соатларда ҳаво анча салқинлашади, ҳарорат 11-16 даража атрофида бўлади.

Тошкентда 18—19 сентябрь кунлари ҳаво бир оз булутли бўлади, вақти-вақти билан ўзгариб туради, асосан ёғингарчиликсиз об-ҳаво кузатилади, фақат 19 сентябрда куннинг иккинчи ярмида бир оз ёмғир ёғиши мумкин. Ҳарорат 26-29 даража бўлади.

20 сентябрда кечаси ва эрталаб ёмғир ёғади, кундузи ёғингарчилик кутилмайди. 21—22 сентябрь кунлари ёғингарчилик кутилмайди. Ҳарорат кечаси 13-15 даражагача, кундузи 23-25 даражагача пасаяди.