Тошкентда “Ўзбекистонда Германия иқтисодиёти куни”га бағишлаб, Ўзбекистон—Германия ўртасидаги савдо-иқтисодий, инвестициявий ҳамда саноат кооперациясини ривожлантиришга доир бир қатор тадбирлар бўлиб ўтди. Бу ҳақда Инвестициялар, саноат ва савдо вазирлиги матбуот хизмати хабар берди.
Қайд этилишича, конференцияда Германия ва Ўзбекистон бизнес ҳамжамиятининг 300 дан ортиқ вакиллари, инвесторлар, шунингдек, Ўзбекистон вазирликлари ва идоралари раҳбарлари ва мутахассислари қатнашган.
Анжуман иштирокчиларининг таъкидлашича, бу каби йирик халқаро тадбирлар ишбилармонлик алоқаларини янада кенгайтириш, икки томонлама савдони ривожлантириш, қўшма инвестиция лойиҳалари ва ташаббусларини илгари суриш истиқболлари ва имкониятларини аниқлаш, умуман, ҳар икки мамлакат ишбилармон доиралари ўртасидаги муносабатларни мустаҳкамлашда муҳим рол ўйнайди.
Сўнгги икки йилда Ўзбекистонга киритилган Германия инвестицияларининг умумий ҳажми қарийб 2 миллиард еврони ташкил этди. Шунингдек, ҳозирги пайтда Германия ҳамкорлари билан бирга қиймати 10 миллиард доллардан ортиқ бўлган 100 дан зиёд қўшма лойиҳалар амалга оширилмоқда.
Сўнгги 6 йилда Ўзбекистонда Германия капитали иштирокида ташкил этилган корхоналар сони қарийб 3 баробар ўсиб, бугунги кунда бу кўрсаткич 200 тага етди. 2023 йилнинг 6 ойи давомида 17 та қўшма корхона ишга туширилган.
Июль ойида Германия Ўзбекистон ва яна олти давлатга 20 миллион евро ажратаётгани тўғрисида хабар берилганди. Май ойида бўлса Ўзбекистон—Германия халқаро соғлиқни сақлаш форумида немис компаниялари ва тиббиёт муассасалари билан умумий қиймати 100 миллион доллардан ортиқ 70 дан зиёд келишув ҳамда меморандумлар имзоланган.
Изоҳ (0)